ރާއްޖޭގައި އުޅޭ ބިދޭސީން ހުއްޓުވާ ސުވާލުކުރުމާ ގުޅުވައި ރައީސް ޑރ. މުހައްމަދު މުއިއްޒު 'އެކްސް' ގައި ކުރެއްވި ޕޯސްޓަށް އާއްމުންގެ ފާޑުކިޔުން އަމާޒުވެއްޖެ އެވެ.

ރައީސް ރޭ 'އެކްސް'ގައި ކުރެއްވި ޕޯސްޓެއްގައި ވިދާޅުވ ރާއްޖޭގައި އުޅެމުންދާ ބިދޭސީންގެ ތެރެއިން ބައެއް ފަރާތްތަކުން ރޭގަނޑުގެ ދަންވަރު ވަގުތުތަކުގައި ރަށުތެރޭގެ އާއްމު މަސްލަހަތު ގެއްލޭ ފަދަ ކަންކަން ކުރަމުންދާތީއާއި އާއްމު އިޖްތިމާއީ މިންގަނޑުތަކާއި ހިލާފަށް އުޅެމުންދާތީ, ދަންވަރު 12:00 އިން ފެށިގެން ހެނދުނު 06:00 އާއި ހަމައަށް އާންމު ތަންތަނުގައާއި މަގުމަތީގައި އުޅޭ ބިދޭސީން ހުއްޓުވާ ސުވާލުކޮށް އަދި ފާހަގަވާ ކަންކަމާއި ގުޅިގެން ޤާނޫނީ ގޮތުން އަޅަންޖެހޭ ފިޔަވަޅެއްވާނަމަ އެ ފިޔަވަޅުއެޅުމަށް އަޅަން ފުލުހުންނަށް އަންގާފައިވާ ކަމަށެވެ. 

ރައީސްގެ ޕޯސްޓަށް ކުރި ރިޕްލައިއެއްގައި ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހުމަދު ޝަމްހީދު ވަނީ އިނގިރޭސިވިލާތުގެ މަގުތަކަށް އެ ހުކުމް އަޔީމަ ކީކޭބާ ހިތަށް އަރާނީ ކަމަށް ބުނެ ސުވާލު އުފައްދާފަ އެވެ.

''މިސަރުކާރުން ބިދޭސީން ދެކެނީ ޖަނަވާރުންގެ ގޮތުގަ.. އިންސާނިއްޔަތުގެ ކަންފުޅެއްވެސް ނެތް. ކޮންދީނެއް ގަބޫލް ކުރާބަެއްއްތޯ ތީ!'' ޝަމްހީދު ވިދާޅުވި އެވެ.

''ވަކި ނަސްލަކަށް ނިސްބަތް ވީތީވެ، ވަކި ގައުމެއްގެ ރައްޔިތަކަށް ވީތީވެ، ތަފާތު ސަގާފަތެއް ނުވަތަ ތަފާތު ގޮތަކަށް ސިޔާސީ ވިސްނުމާއި ފިކުރު ހުރީތީވެ ތަފާތު ކުރުމަކީ ބަލައިގަނެވޭނެ ކަމެއް ނޫން.'' ފޯމީ ނަމަކަށް ކިޔާ އައިޑީ އަކުން 'އެކްސް' ގައި ކުރި ޕޯސްޓެއްގައި ބުންޏެވެ.

އެމްޖޭއޭގެ އެގްޒެކެޓިވް ޑިރެކްޓަރު، މުހައްމަދު ޖުނައިދު ސަލީމް، ރައީސްގެ ޕޯސްޓު ރީ ޕޯސްޓުކޮށް ވިދާޅުވީ ބިދޭސީން ހުއްޓުވާ ސުވާލުކުރުމަކީ ގާނޫނު އަސާސީން ލިބިފައިވާ ހައްގުތަކާ ސީދާ ހިލާފުވުން ކަމަށެވެ. އެކަން ކުށްވެރިކޮށް މި ސަރުކާރުން ''ޒެނޮފޯބިކް' ޕޮލިސީސްތައް އެކުލަވާލަމުންދާ ކަމަށް ޖުންދު ތުހުމަތުކުރި އެވެ.

ލަތީ ކިޔާ މީހަކު ކުރި ޕޯސްޓެއްގައި ބުނީ މަސްލަހަތު ގެއްލޭ ކަންކަން އެންމެންވެސް ކުރާ ކަަމަށެވެ. ''އެއީ ހަމައެކަނި ބިދޭސީންކުރާ ކަމެއް ނޫން'' އޭނާ ބުންޏެވެ.