ރިޓާޔާ ވުމަށް ފަހު ދައުލަތުގެ މަގާމަކަށް އަންނަނަމަ، އެ މަގާމެއް އަދާކުރަމުންދާ މުއްދަތުގައި ރިޓަޔަމަންޓް އެލަވެންސް ނުދޭ ގޮތަށް ވަރަށް އަވަހަށް ހަމަޖައްސަވާނެ ކަމަށް ރައީސް ޑރ. މުއްމަދު މުޢިއްޒު އިއުލާނުކުރައްވައިފި އެވެ.

ރޭ ހުޅުމާލެ ފޭސް އެކެއްގެ ރައްޔިތުންނާއެކު ބޭއްވި ބައްދަލުވުމުގައި ރައީސް ވިދާޅުވީ ރިޓަޔާވުމަށް ފަހު ސަރުކާރުގެ އިސް މަގާމުތަކަށް އައްޔަނު ކުރައްވާ ބޭފުޅުންނަށް ވެސް މަގާމުގެ މުސާރައާއި އެކީ އެލަވެންސް ދިނުމުގެ ސަބަބުން ސަރުކާރުގެ ހަރަދުތައް ބޮޑު ކަމަށެވެ. އެހެންވެ ރައްޔިތުންގެ ޝަކުވާ އެކަމަށް އަންނާތީ މައްސަލައަށް ހައްލެއް ހޯދައި ދިނުމަށް މަސައްކަތް ކުރައްވާ ކަމަށް ވިދާޅުވި އެވެ.

"ސަރުކާރުގެ އައްޔަނު ކުރާ އެއްވެސް މަގާމަކަށް ރިޓަޔާޑް ބޭފުޅަކު އައްޔަނު ކޮށްފިނަމަ ނޫނިއްޔާ އިންތިހާބީ މަގާމަކަށް ރިޓަޔާޑް ބޭފުޅަކު އިންތިހާބު ވެއްޖެނަމަ، އެ މަގާމުގައި ހޭދަކުރާ މުއްދަތުގެ ތެރޭގައި ރިޓަޔާމެންޓަށް ލިބޭ އެލަވެންސް މެދު ކެނޑޭ ގޮތަށް" ރައީސް މުއިއްޒު ވިދާޅުވި އެވެ.

އެމަނިކުފާނު ވިދާޅުވީ އެކަން ބަދަލުކުރަން އެ މަނިކުފާނު މިހާރު އަންގަވައިފައިވާ ކަމަށާއި ސިވިލް ސާވިސް ކޮމިޝަނުން އެ ބަދަލުތައް ގެނައުމުގެ މަސައްކަތް ކުރާ ކަމަށެވެ.