ވީޑިއޯ އެސިސްޓެންޓް ރެފްރީ (ވީއޭއާރް) އިން ގޯސް ނިންމުމެއް ނިންމައިފިކަމަށާއި، އެހެންނަމަވެސް ދެން ނަތީޖާ ބަދަލުނުވާނެކަމަށް އެތުލެޓިކޯ މެޑްރިޑުން ބުނެފިއެވެ.

ޗެމްޕިއަންސް ލީގު ގަދަ 16 ގައި ރެއާލް މެޑްރިޑް އަތުން ޕެނަލްޓީ ޖަހައިގެން ބަލިވި މެޗަށްފަހު އެތުލެޓިކޯއިން ނެރުނު ބަޔާނެއްގައި ބުނީ އެ ޓީމަކީ ޝަކުވާކުރާނެ ޓީމެއް ނޫންކަމަށެވެ.

އެ މެޗު 1-0 ގެ ނަތީޖާއަކުން އެތުލެޓީކޯއިން ކާމިޔާބުކުރުމުން ދެ މެޗުގެ އެގްރިގޭޓް 2-2 އިން އެއްވަރުވުމުން ނަތީޖާ ނެރުމަށް ޖެހުނީ ޕެނަލްޓީ ޖަހާށެވެ.

އެ ޓީމުގެ ޒުވާން ފޯވާޑް ހޫލިއަން އަލްވަރޭޒް ފޮނުވާލި ޕެނަލްޓީގައި ދެފަހަރު ބޯޅައިގައި ފައި ޖެހުނުކަމަށް ވީއޭއާރު ބަލައި ރެފްރީ ނިންމިއައި އެ ޕެނަލްޓީ ނުވަންނަކަމަށް ކަނޑައެޅިއެވެ. އެ ޕެނަލްޓީގެ ފައިދާ ނަގައިގެން ރެއާލުން ވަނީ ކުއާޓާ ފައިނަލްގެ ޖާގައެއް ކަށަވަރުކޮށްފައެވެ.

އެތުލެޓިކޯއިން ނެރުނު ބަޔާނުގައި ބުނީ އެގޮތަށް ވީއޭއާރު ބަލައި ނިންމުމުން އެ ޓީމުން ހިތާމަ ކުރާކަމަށެވެ. އެހެންނަމަވެސް ޝަކުވާ ކުރުމުގެ ބަދަލުގައި އެ ޓީމުން ވިސްނަނީ ކުރިއަށްހުރި ލީގުގެ މެޗުތަކަށާއި ކޮޕަ ޑެލްރޭގެ ދެވަނަ ލެގުގެ މެޗުތަކަށްކަމަށް އެ ޓީމުން ބުންޏެވެ.

އެ ޓީމުން ބުނީ ވީއޭއާރު ބެލުމުން ބޯޅައަށް އެއްވެސް ކަހަލައިގެ ގުޑުމެއް ނާންނަކަން އެނގޭކަމަށެވެ. އަދި އެ ނިންމުމަކީ އިތުރަށް ބެލުމެއްނެތި ޔަގީންކުރުމެއްނެތި ނިންމި ނިންމުމެއްކަމަށް އެ ޓީމުން ބުންޏެވެ.