އުސް އިމާރާތެއްގެ ނުވަ ވަނަ ފަންގިފިލާ އިން ޖެހިގެން ހުރި ގުދަނުގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު މައްސަލާގައި ބައިވެރިވުން އޮތް ކަމަށް ބެލެވޭ ރައުދު އަހުމަދު ޒިލާލުގެ ބަންދަށް 5 ދުވަސް ކްރިމިނަލް ކޯޓުން ޖަހައިފި އެވެ.

މި މައްސަލައިގައި ރައުދު ހައްޔަރުކުރީ ހާދިސާ ހިނގިތާ ހަފްތާއެއް ފަހުން މިދިޔަ މަހުގެ 24 ވަނަ ދުވަހުގައެވެ. ހަތަރު ފަހަރެއްގެ މަތީން ދައުރުގެ ބަންދު ޖަހައި، އެންމެ ފަހުން ދިން 20 ދުވަސް ހަމަ ނުވަނީސް އިއްޔެ ހެނދުނު އޭނާ ދޫކޮށްލިއެވެ.

އަލުން އޭނާ ހައްޔަރުކުރީ އިއްޔެ ހަވީރުގެ ވަގުތެއްގައެވެ. މިއަދު ބަންދުގެ މުއްދަތު ޖަހަން ކޯޓަށް ހާޒިރުކުރުމުން ބަންދަށް 5 ދުވަސް ޖަހައި ދިން ކަމަށް ފުލުހުން ބުންޏެވެ.

ރައުދުގެ މައްޗަށް ކޮށްފައިވަނީ މި ހާދިސާގައި ބައިވެރިވުމުގެ ތުހުމަތުގެ އިތުރުން، މަސްތުވެފައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތެވެ.

މި މައްސަލައިގައި ޔުމްނުއާއެކު އުޅުނު އިތުރު 7 މީހުންގެ ތެރެއިން ރައުދު ފިޔަވައި އެހެން އެންމެން ވަނީ ކުޑަކަމުދާ ތަކެތީގެ ސާމްޕަލް ދިނުމަށް އިންކާރުކޮށްފައެވެ. އެކަމަށް ފިޔަވަޅު އަޅަން ޕްރޮސެކިއުޓަ ޖެނެރަލް (ޕީޖީ) އޮފީހުން ފުލުހުންގެ މައްޗަށް އަމުރުކޮށްފައިވެ އެވެ. މި ވަގުތު އެ މީހުންގެ ޕާސްޕޯޓް ވަނީ ހިފަހައްޓައިފަ އެވެ.

މައްސަލައާ ގުޅިގެން ފުލުހުން ވަނީ މިނިސްޓަރު އަމީންގެ އެއްބަނޑުއެއްބަފާ ދެބެއިންގެ ގެ، މއ. މާންދޫގެދެކުނުގެ ޓެރެސް އާއި އެ ގޭގެ ދެވަނަ އަދި ހަތަރުވަނަ ފުލޯގެ އިތުރުން ގ. ކަށިވެލީގެ ތިންވަނަ ފްލޯ ވެސް ބަލައި ފާސްކޮށްފައެވެ. ނަމަވެސް، މި ތަންތަނުން މައްސަލައާ ގުޅޭ އެއްވެސް ހެއްކެއް ލިބިފައިނުވާ ކަމަށް ފުލުހުން ވަނީ ކުރިން ބުނެފަ އެވެ.

މި މައްސަލާގައި ފުލުހުންގެ މައްޗަށް 'ސިޔާސީ' ނުފޫޒު ފޯރުވާފައިވާ ކަމަށް ތުހުމަތުކޮށް ކޮންމެ ރެއަކުހެން މާލެ މަގުމަތީ ޒުވާނުން ގެންދަނީ މުޒާހަރާކުރަމުންނެވެ. ތަފާތުކުރުމުގެ ސަގާފަތާ ދެކޮޅަށް އަޑުއުފުލަމުން ގެންދިއުން މަރުހަބާ ވިދާޅުވާ ކަމަށް ރައީސް މުހައްމަދު މުއިއްޒު މި މަހުގެ 3ގައި އެމަނިކުފާނު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައިވެ އެވެ.