އޭޝިއަން ކަޕްގެ ކޮލިފައިންގައި މި މަހުގެ 25 ވަނަ ދުވަހު ފިލިޕީންސާ ދެކޮޅަށް ކުޅޭ މެޗަށް ތައްޔާރުވާން އިންޑިއާއާ ދެކޮޅަށް ރާއްޖޭން ކުޅުނު އެކުވެރިކަމުގެ މެޗުގައި ރާއްޖެ ބަލިވެއްޖެއެވެ.

އިންޑިއާގެ ޖަވަހަރް ލާލް ނެހެރޫ ސްޓޭޑިއަމްގައި މިރޭ ކުޅުނު އެ މެޗުން ރާއްޖެ ބަލިވީ 3-0 ގެ ނަތީޖާއަކުންނެވެ.

އެ މެޗު އެއްކޮށް ކޮންޓްރޯލްކޮށްގެން ކުޅުނީ އިންޑިއާއިންނެވެ. ނަމަވެސް ލިބުނު މަދު ފުރުސަތުތަކުގައި ރާއްޖެއިން ވަނީ ހަމަލާއެއް އުފެއްދޭތޯ މަސައްކަތްކޮށްފައެވެ.

އެގޮތުން މެޗު ފަށައިގެން އޭރިއާ ބޭރުން ރާއްޖޭގެ ހަމްޒާ މުހައްމަދު ފޮނުވާލި ބާރު ހަމަލާ ދިފާއުކުރީ އިންޑިއާގެ މެހެތާބު ސިންގއެވެ.

މެޗުގެ ގިނަ ހަމަލާތަކެއް އުފެއްދި އިންޑިއާއިން މެޗުގެ ލީޑު ނެގީ 35 ވަނަ މިނެޓުގައެވެ. އެ ގޯލު ޖެހީ ރާހުލް ބެކޭއެވެ.

ދެވަނަ ހާފުގައި އިންޑިއާއިން ވަނީ ދެ ގޯލު ޖަހަައިފައެވެ. 66 ވަނަ މިނެޓުގައި ލިސްޓޮން ކޮލްކަޮ ގޯލެއް ޖެހިއިރު، 76 ވަނަ މިނެޓުގައި އިންޑިއާގެ ތިން ވަނަ ގޯލު ޖަހައިދިނީ ސުނުލް ޗެތުރީއެވެ.