ރަސްމާލެ މަޝްރޫއު ހިއްކުމުގެ މަސައްކަތުގެ ދަށުން ހަތަރު ސަރަޙައްދަކުން 52.15 ހެކްޓަރުގެ ބިން ހިއްކާފައިވާކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.

އެ މަޝްރޫއުގެ ދަށުން 1،153 ހެކްޓަރުގެ ބިން ހިއްކަން ނިންމާފައިވާއިރު، އެ މަސައްކަތް ކުރިއަށްދަނީ 12 ސަރަހައްދަކަށް ބަހާލައިގެންނެވެ. އެ ސަރަހައްދުތަކުގެ ތެރެއިން މިހާތަނަށް ބިން ހިއްކައި ނިމިފައިވަނީ އެންމެ ސަރަހައްދެއްގައެވެ. އެއީ 29 ހެކްޓަރެވެ. އެތަން ހިއްކީ، ރަސްމާލެ ހިއްކަން ފުރަތަމަ ހަވާލުކުރި ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ) އިންނެވެ. ނަމަވެސް އެ ކުންފުންޏަށް އެ މަސައްކަތް ނުކުރެވި، ފަހުން އެޗްޑީސީއާ ހަވާލުކުރީއެވެ.

އެޗްޑީސީގެ އޮފިޝަލަކު "ކުރިއަށް މީޑިއާ" އަށް މިއަދު ވިދާޅުވީ، މިހާރު ކުރިއަށްދަނީ އޭރިއާ ޑީ، އެފް، ޖީ އަދި އެލް ހިމެނޭ ސަރަހައްދުތައް ހިއްކުމުގެ މަސައްކަތް ކަމަށާއި އެގޮތުން މިހާތަނަށް އެ ސަރަހައްދުތަކުން  52.15 ހެކްޓަރުގެ ބިން ހިއްކާފައިވާ ކަމަށެވެ.

އޮފިޝަލް ވިދާޅުވި ގޮތުގައި އެ ސަރަހައްދުތަކުން ޖުމްލަ 378 ހެކްޓަރު ހިއްކާނެއެވެ. އެޗްޑީސީން ރަސްމާލެ ހިއްކަމުން އަންނަނީ އިންޑިއާގެ މޯހަން މުތާ އެކްސްޕޯޓު (އެމްއެމްއީ) އާއި ޗައިނާގެ ޗައިނާ ރެއިލްވޭ ކޮންސްޓްރަކްޝަން ކޮމްޕެނީ (ސީއާރުސީސީ) އާ ހަވާލުކޮށްގެނެވެ. ރަސްމާލެ ހިއްކުން އަލުން ފެށީ މިދިޔަ ނޮވެމްބަރު މަހުގެ ދިހަ ވަނަ ދުވަހުއެވެ.

ސަރުކާރުން ބުނެފައިވާ ގޮތުގައި ރަސްމާލެ މަޝްރޫއު ނިމުމުން 65،000 ގެދޮރު ޔަގީންވާނެއެވެ. ތިމާވެއްޓާ ރައްޓެހި "އިކޯ ސިޓީ"އެއްގެގޮތުގައި ތަރައްގީކުރާ ރަސްމާލެއަކީ މި ސަރުކާރުގެ އެންމެ މުހިންމު އެއް ވައުދެވެ.