ކިޔަވައިދޭ ގަޑިތައް ނުގެއްލޭގޮތައް ރަމަޟާން މަހަކީ ކިޔެވުން ބަންދު ދުވަސްތަކުގެ ގޮތުގައި ހަމަޖެއްސެވުމަށް ބައްލަވަމުން އަންނަ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. 

"ރައްޔިތުންނާ އެކު" ނަމުގައި މިއަދު ކުރިއަން ގެންދަން ފަށާފައިވާ ޕޮޑްކާސްޓްގައި ރައީސް  ވިދާޅުވީ މި އަހަރު އެކަޑެމިކް ކަލަންޑަރުގައި މި ހިނގަމުންދާ ރަމަޟާން މަހުގެ ފުރަތަމަ ހަފްތާ ފިޔަވައި މުޅި ރަމަޟާން މަސް އެއްކޮށް ބަންދުކުރާ ގޮތަށް ކަނޑައަޅާފައިވާ ކަމަށާއި އެގޮތަށް ހަމަޖެއްސުމުން ބެލެނިވެރިންގެ ފަރާތުން އެކަމަށް އެދެވޭ ރަނގަޅު ޚިޔާލުތަކެއް ލިބިފައިވާކަމަށެވެ.

ރައީސް ވިދާޅުވީ އެކަމަކީ ގިނަ ބެލެނިވެރިން އެދޭގޮތެއް ކަމުގައި އެ މަނިކުފާނަށް ފެނިވަޑައިގަންނަވާތީ ކުރިއަށް އޮތް އަހަރުގައިވެސް އެކަމަށް މަގުފަހިކޮށްދެއްވުމަށް މަސައްކަތް ކުރައްވާނެކަމަށެވެ.

ރައީސް ވިދާޅުވެފައިވަނީ ރަމަޟާންމަސް ސްކޫލުތަކުގެ ކިޔެވުން ބަންދުކުރުމުގެ ސަބަބުން ދަރިވަރުންނާއި، ބެލެނިވެރިންވެސް އަޅުކަމުގައި ވަގުތު ހޭދަކުރުމަށް މަގުފަހިވެގެންދާނެކަމަށެވެ. އަދި ރަމަޟާން މަހުގެ ފަހު ދިހައެއްގައި ލައިލަތުލްގަދްރި ވިލޭރޭ ހޯދުމަށްޓަކައި އިތުރަށް ސަމާލުކަން ދީ މަސައްކަތް ކުރުމަށް އަންގަވާފައި އޮންނައިރު އެ ރޭގެ ސަވާބާއި ދަރުމަ ހޯދުމަށްޓަކައި މަސައްކަތް ކުރުމުގެ ފުރުސަތު ބޮޑުވެގެންދާނެކަމަށެވެ. އަދި ރާއްޖެއަކީ ސައްތައިންސައްތަ މުސްލިމް ގައުމަކަށް ވެފައި އަހަރެމެންގެ ދީނުގައި ހުންނަ މިފަދަ ކަންތައްތައް ހޯދުމަށް މަގުފަހިކޮށްދިނުމަށް މަސައްކަތް ކޮށްދީ ބާރު އަޅާނެކަމަށް ރައީސް ވިދާޅުވިއެވެ. 

ރައީސް ވަނީ ދިރާސީ ކިޔެވުމުގެ މުއްދަތު ޖެނުއަރީ މަހަށް ބަދަލުކުރައްވާފައެވެ. އެއާ ގުޅުވައި މިދިޔަ އަހަރުގެ ދިރާސީ ކިޔެވުމަށް ބަދަލުތަކެއް ގެންނަވާފައިވެއެވެ. އެ ބަދަލުގެ ސަބަބުން މި ރަމަޟާންމަހު ކިޔަވާ ކުދިން ތިބީ ކިޔެވުން ބަންދުވެ ޗުއްޓީގައެވެ.

މި އަހަރުގެ ދިރާސީ އަހަރުގެ ކިޔެވުން ފެށޭނީ އަންނަ މަހުގެ ހަ ވަނަ ދުވަހުއެވެ. އަދި މިއަހަރުގެ ދިރާސީ އަހަރުގެ ކިޔެވުން މި ޑިސެންމްބަރު 28ގައި ނިމޭގޮތަށް ރައީސްވަނީ ބަދަލުގެންނަވާފައެވެ.