ރައީސް ޑރ. މުހައްމަދު މުއިއްޒާއި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދު ރައީސް އޮފީހުގައި ބައްދަލުކުރައްވައިފިއެވެ. މި ބައްދަލުވުމުގައި ޕީއެންސީގެ ޕާލަމެންޓަރީ ގްރޫޕްގެ ލީޑަރު އިބްރާހިމް ފަލާހް ވެސް ބައިވެރިވެ ވަޑައިގެންނެވިއެވެ.

ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވި ގޮތުގައި، މި ބައްދަލުވުމުގައި ރައްޔިތުންގެ މަޖިލީހުގެ މި އަހަރުގެ ފެށުނު ދައުރަށް ސަރުކާރުން ފޮނުއްވަން ހުރި ބިލުތަކާ މެދު މަޝްވަރާކުރެއްވިއެވެ. "މި ބައްދަލުކުރެއްވުމަކީ ކޮންމެ ދައުރެއްގެ ކުރީކޮޅު ކުރިއަށް ގެންދަވާ މަޝްވަރާ ބައްދަލުވުމެއް، މިފަދަ ބައްދަލުވުމެއް މިދިޔަ އަހަރު ވެސް ބޭއްވުނު" ކަމަށް ހީނާ "އެކްސް" ގައި ކުރެއްވި ޕޯސްޓެއްގައި ވިދާޅުވިއެވެ.

މި ބައްދަލުވުން ބޭއްވުނީ ފާއިތުވި ދުވަސްތަކުގައި ރައީސް މުއިއްޒާއި މަޖިލިހުގެ ރައީސް އަބްދުއްރަހީމްއާ ދެމެދު ހިޔާލު ތަފާތުވުންތަކެއް އުޅޭ ކަމަށް ބުނެ އަޑުތައް ފެތުރިފައިވަނިކޮށެވެ. މި އަޑުތައް އިތުރަށް ގަދަވެފައިވަނީ އަބްދުއްރަހީމްގެ ދަރިކަލުން އަދި ކުރީގެ ޓޫރިޒަމް މިނިސްޓަރު އިބްރާހިމް ފައިސަލް މަގާމުން ވަކިކުރެއްވުމާ ގުޅިގެންނެވެ.

ނަމަވެސް، އޭގެ ފަހުން މަޖިލިހުގެ ރައީސް އަބްދުއްރަހީމް ވަނީ އެކި މުނާސަބަތުތަކުގައި ރައީސް މުއިއްޒަށް ތައުރީފުކުރައްވާ ވާހަކަފުޅުތަކެއް ދައްކަވާފައެވެ. މިއަދުގެ ބައްދަލުވުމަކީ ދެ ފަރާތުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ބައްދަލުވުމެއް ކަމަށް ސިޔާސީ މައިދާނުގައި ދެކެއެވެ.