ރައީސް ޑރ. މުހައްމަދު މުއިއްޒު މި އަހަރު ހައްޖަށް ވަޑައިގަންނަވަނީ ރާއްޖެއަށް ދޭ 1000 ކޯޓާގެ ތެރެއިން ނޫން ކަމަށް އެމަނިކުފާނު ވިދާޅުވެއްޖެއެވެ. 

"ރައްޔިތުންނާ އެކު" ޕޮޑްކާސްޓްގައި ރައީސް ވިދާޅުވީ އެމަނިކުފާނު ހައްޖަށް ވަޑައިގަންނަވަނީ ސައުދީ ސަރުކާރުން ޗާޓަރުކޮށްދޭ ވަކި ފްލައިޓެއްގައި ކަމަށެވެ. އަދި ދަތުރުގެ ހުރިހާ ހަރަދުތަކެއް ވެސް ބަލަހައްޓާނީ އެ ގައުމުން ކަމަށް ވިދާޅުވިއެވެ. 

ރައީސް އުމްރާއަށް ވަޑައިގެންނެވި އިރު ވެސް ކަން ހިނގީ މިފަދައިން ކަން ފާހަގަކުރެއްވިއެވެ. އަދި އެ ފަހަރު ވެސް ވަޑައިގަތީ ސައުދީ ސަރުކާރުގެ ފުރިހަމަ ހަރަދުގައި ކަމަށް ވިދާޅުވިއެވެ.

"އަޅުގަނޑަށް އަދި މީގެ ކުރިން، ވެރިކަން ކުރެއްވި ބޭފުޅުންނަށް ވެސް އެ ދޭ ހާއްސަ ފުރުސަތުތަކަކީ، ކޯޓާތެރެއިން ދާ ކަމެއް ނޫން. 1000 ކޯޓާއަކީ ކޯޓާ. އެއިން ބޭރުން ހާއްސަ ފުރުސަތެއް، ނޫނީވިއްޔާ ދައުވަތެއް މި ލިބެނީ،" ރައީސް ވިދާޅުވި އެވެ.

ރައީސްއާއި ފަސްޓް ލޭޑީ ސާޖިދާ މުހައްމަދު ހައްޖަށް ފުރައިވަޑައިގަންނަވަނީ މާދަމާ އެވެ. މިއަހަރުގެ ހައްޖު ދުވަހަކީ މި އަންނަ ބުރާސްފަތި ދުވަހެވެ.