"ރައްޔިތުންނާއެކު" ޕޮޑްކާސްޓްގެ ފުރަތަމަ އެޕިސޯޑު މިއަދު ފަށައި ރައީސް އޮފީހުގެ ހުރިހާ ސޯސަލް މީޑިއާ ޗެނަލަކުން ދަށްކަން ފަށައިފިއެވެ. 

މިހާރު މި ޕްރޮގްރާމްގެ ފުރަތަމަ އެޕިސޯޑު މި ވަނީ ފެށިފައެވެ. ރައީސް އޮފީހުގެ ސޯސަލް މީޑިއާ ޗެނަލްތަކުން މިއަދު މި ވަނީ މި ޕްރޮގްރާމް ފެންނާނެގޮތަށް ރައްޔިތުންނަށް ދޫކޮށްލާފައެވެ. 

ޕޮޑްކާސްޓްގެ ހޯސްޓްގެ ގޮތުގައި ފެންނަނީ ޓީވީއެމްގެ އެންމެ ދުވަސްވީ ޕްރެޒެންޓަރު، ހޭޔަންބޯ، އަދި ރަމަޟާންމަހު ގެނެސްދޭ ފޯރިގަދަ ޕްރޮގްރާމް، ފުރުސަތުގެ ފުރުސަތު ފަދަ ވަރުގަދަ ޝޯތަކުން ފެންނަ އަހުމަދު ޝަކީބް (ޝަކިއްބެ)އެވެ. 

ރައީސް ޑރ. މުހައްމަދު މުއިއްޒު ރައްޔިތުންގެ ސުވާލުތަކަށް ސީދާ ޖަވާބު ދެއްވުމަށްޓަކައި މިދިޔަ އަހަރުގެ ފެބުރުއަރީ މަހު ރައީސް އޮފީހުގެ މީޑިއާ ޓީމުން ސިލްސިލާ ޕްރޮގްރާމެއް ހިންގަންފެށިއެވެ. މި ޕްރޮގްރާމްގެ ދަށުން ރައްޔިތުންނަށް ވީޑިއޯ މެދުވެރިކޮށް ސުވާލު ހުށަހެޅުމަށް ފުރުސަތު ހުޅުވައިލިއެވެ. އަދި ރައްޔިތުންގެ ސުވާލުތަކަށް ޖަވާބު ދިނުމުގެ ޕްރޮގްރާމް ކުރިއަށް ގެންދިޔައެވެ. ހުޅުވައިލެވުނު ފުރުސަތުގެ ދަށުން ކޮންމެ ދުވަހަކު ކޮންމެވެސް ރައްޔިތެއްގެ ސުވާލަށް ޖަވާބުދެއްވުން ކުރިއަށް ގެންދިޔައެވެ. ވީޑިއޯ ސުވާލު ހުށައެޅުމުގެ ސިލްސިލާގެ އެންމެ ފަހު ވީޑިއޯއެއް ހުށަހެޅީ މިދިޔަ އަހަރުގެ އޭޕްރީލް މަހުއެވެ. 

ރައީސަށް ސުވާލު ހުހެއެޅުމުގެ ފުރުސަތު މެދުކެނޑުމަށްފަހު އަނެއްކާވެސް ވީޑިއޯ ސުވާލު ހުށަހެޅުމުގެ ފުރުސަތު ހުޅުވައިލިކަމަށް ރައީސް އޮފީހުން  ބުނެފައިވަނީ މި މަހުގެ 18ވަ ނަ ދުވަހުއެވެ. މި ފަހަރު ހުޅުވައިލެވުނު ފުރުސަތަކީ ރާއްޖޭގެ ކޮންމެ ރައްޔިތަކަށްވެސް ރައީސަށް ސުވާލު ހުށަހެޅޭނެގޮތަށް ފެށި ފުރުސަތެއްކަމަށް ރައީސް އޮފީހުން ބުނެފައިވެއެވެ.