ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހާއްސަ އިރުޝާދުގެ ދަށުން، މާލެއާއި އަތޮޅުތަކާ ދެމެދު ދަތުރުކުރާ ރައްޔިތުންނަށް ލުޔެއް ހޯދައިދިނުމުގެ ގޮތުން އެމްޓީސީސީގެ ހެންވޭރު އަދި ހުޅުމާލެ ފެރީ ޓާމިނަލް، އާންމު ލޯންޗު ފެރީ ޚިދުމަތްތަކަށް ހުޅުވާލުމަށް ވަނީ ނިންމާފައެވެ.

މި ނިންމުމާ ގުޅިގެން، ލޯންޗު ފެރީގެ ޚިދުމަތް ފޯރުކޮށްދޭ ފަރާތްތަކަށް މި ދެ ޓާމިނަލް ބޭނުންކުރުމުގެ ފުރުސަތު ލިބިގެންދާނެއެވެ. މިކަމާ ގުޅޭ އިޢުލާން މިހާރު ވަނީ ސަރުކާރުގެ ގެޒެޓުގައި ޝާއިޢުކޮށްފައެވެ. ޝައުޤުވެރިވާ ފަރާތްތަކުން 10 މާރިޗު 2025 ވަނަ ދުވަހުގެ 14:00 ގެ ކުރިން [email protected] އަށް އީމެއިލް މެދުވެރިކޮށް ހުށަހެޅުމަށް ވަނީ އަންގާފައެވެ.

އެމްޓީސީސީން މަޢުލޫމާތު ދެއްވާ ގޮތުގައި، މި ދެ ފެރީ ޓާމިނަލަކީ މި ފަދަ ޚިދުމަތްތަކަށް ޚާއްސަކޮށް ފައްކާކުރެވިފައިވާ ދެ ތަނެވެ. އަދި މި ޚިދުމަތް ފެށުމުން ރައްޔިތުންނަށް ފަސޭހަ ނިޒާމެއްގެ ތެރެއިން ކަންކަން އިންތިޒާމުކޮށްދިނުމަށް އެ ކުންފުނިން ވަނީ ކަށަވަރުކޮށްދީފައެވެ.

1980 ވަނަ އަހަރު އުފެދުނު އެމްޓީސީސީއަކީ މިހާރު ދިވެހި ރައްޔިތުންގެ އާންމު ދަތުރުފަތުރުގެ އެންމެ މުހިންމު ބައިވެރިޔާއެވެ. ވޭތުވެދިޔަ 44 އަހަރު ތެރޭގައި ރާއްޖޭގެ އެކި ކަންކޮޅުތަކުގައި އުމްރާނީ ތަރައްޤީގެ ގިނަ މަޝްރޫޢުތަކެއް ހިންގައި ކާމިޔާބުކަމާއެކު ނިންމާފައިވާ މި ކުންފުނިން، މި އައު ޚިދުމަތާއެކު ރައްޔިތުންނަށް އިތުރު ލުޔެއް ލިބިގެންދާނެ ކަމަށް ބެލެވެއެވެ.