މޯލްޑިވްސް މާރކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން(އެމް.އެމް.ޕީ.އާރް.ސީ)/ ވިޒިޓް މޯލްޑިވްސް އާއި އެލް.އެފް.ސީ ގުޅިގެން ކޯ ބްރޭންޑަޑް އިނީޝިއޭޓިވެއްގެ ގޮތުގައި ކުރިއަށްގެންދާ ރާއްޖޭގެ ފަތުރުވެރިކަމުގެ ކެމްޕެއިން ރަސްމީކޮށް ރޭ ފައްޓަވައިފިއެވެ.

ރައީސް އިނގިރޭސިވިލާތުގެ ލިވަޕޫލަށް ކުރެއްވި ދަތުރުގެ ކެމްޕެއިންގެ ތެރެއިން ވަނީ ރާއްޖޭގެ ފަތުރުވެރިކަން ފަށާ ފުޓުބޯޅަ މެޗު ބައްލަވާލާފައެވެ. އިނގިރޭސި ޕްރިމިއަލީގުގައި އެވަޓަން އާއި ލިވަޕޫލް ފުޓުބޯޅަ ކުލަބު(އެލް.އެފް.ސީ) ބައްދަލުކުރި މެޗު ރައީސް ބައްލަވާލައިފައިވެއެވެ. މި ދަތުރުރުފުޅުގައި މިނިސްޓަރ އޮފް ޓޫރިޒަމް އެންޑް އެންވަޔަރމެންޓް ތާރިގް އިބްރާހިމާއި، މިނިސްޓަރ އޮފް ސްޕޯޓްސް ފިޓްނަސް އެންޑް ރެކްރިއޭޝަން އަބްދުﷲ ރަފީޢު އާއި އެމް.އެމް.ޕީ.އާރް.ސީގެ މެނޭޖިންގް ޑިރެކްޓަރު އިބްރާހިމް ޝިއުރީގެ އިތުރުން ސަރުކާރުގެ ބައެއް އިސްވެރިން އެމަނިކުފާނުގެ އަރިހުގައި ބައިވެރިވެވަޑައިގެންނެވިއެވެ.    

ލިވަޕޫލް އެފްސީގެ ރަސްމީ ޓޫރިސްޓް ޑެސްޓިނޭޝަން ޕާޓްނަރަކީ އެމް.އެމް.ޕީ.އާރް.ސީ/ވިޒިޓް މޯލްޑިވްސް ކަމަށް ނިމިދިޔަ މާރިޗު މަހު 13ވަނަ ދުވަހު އިއުލާންކޮށްފައިވެއެވެ. މި ޕާޓްނަރޝިޕްގެ ދަށުން ތިން އަހަރާއި ހަމަސްދުވަހުގެ ބައިނަލްއަގްވާމީ ކެމްޕެއިނެއް ކުރިއަށްގެންދިއުމަށް ހަމަޖެހިފައިވެއެވެ.

އެލް.އެފް.ސީ އާއި އެކު ވިޒިޓް މޯލްޑިވްސްއިން ގާޢިމްކުރި ޕާޓްނަރޝިޕްގެ ދަށުން، މި ހުސްވިމަހުގެ 27ވަނަ ދުވަހު ވިޒިޓް މޯލްޑިވްސްއިން ފުޅާ ދާއިރާއެއްގައި އައުޓް ޑޯރ ކެމްޕެއިނެއްވެސް ފަށާފައިވެއެވެ. ތިން މަސްދުވަހުގެ މި ކެމްޕެއިންގެ ދަށުން އިނގިރޭސިވިލާތުގެ އިސްތިރާޖީ ބައެއް ސަރަހައްދުތަކުގައި އައުޓްޑޯރ އަދި ޑިޖިޓަލް އެޑްވަރޓައިޒިންގް މަސައްކަތްތަކެއް ކުރިއަށްގެންދިއުމަށް ހަމަޖެހިފައިވެއެވެ. 

ވިޒިޓް މީލްޑިވްސްއިން މި ކެމްޕެއިންގެ މައުލޫމާތުތައް މީޑިއާއަށް ހިއްސާކުރުމަށްޓަކައި މީގެ ކުރިން އާންމުކުރި ނޫސް ބަޔާނުގައި ބުނެފައިވަނީ މި ކެމްޕެއިންގެ ދަށުން ލަންޑަންގެ 100 ޓެކްސީއެއްގަޔާއި، ބަސްތަކާއި، ލަންޑަން އަންޑަރގްރައުންޑާއި، ވައިގެ ބަނދަރުތަކުގެ އިތުރުން ބިޒްނަސްކްލާސް ލައުންޖުތަކުގައި ވިޒިޓް މޯލްޑިވްސް ބްރޭންޑް ގިނަ އަދަދެއްގެ ބަޔަކަށް އިސްތިހާރު ކުރެވިގެންދާނެކަމަށެވެ. 

މީގެ އިތުރުން މި ކެމްޕެއިންގެ ޒަރިއްޔާއިން ވިޒިޓް މޯލްޑިވްސްގެ ބްރޭންޑް ވާސިލުވާ މިންވަރު އިތުރުކުރުމާއި، ރާއްޖެ އަންނަ ފަތުރުވެރިންގެ އަދަދު އިތުރުކުރުމުގެ އިތުރުން ރާއްޖެއަށް މުހިންމު އިގްތިސާދީ މަންފާތަކެއް ކުރާނެކަމަށްވެސް ވިޒިޓް މޯލްޑިވްސް އިން ކުރިން ނެރުނު ނޫސްބަޔާނުގައި ބުނެފައިވެއެވެ.