މޫޑީސް އިން ރާއްޖެއަށް ދީފައިވާ ކްރެޑިޓް ރޭޓިން މަތިކޮށްފިއެވެ.

މޫޑީސް އިން ރާއްޖެއަށް ދީފައިވާ ކްރެޑިޓް ރޭޓިން ވަނީ އެ ރޭޓިންގެ އައުޓްލުކް ނެޖެޓިވް ސްޓޭބަލް އަށް ބަދަލުކޮށްފައެވެ. ނަމަވެސް ރާއްޖޭގެ ކްރެޑިޓް ކަމަށްވާ ސީއޭއޭ -2 ހަމަ އެ ގޮތަށް ދަމަހައްޓާ ފައިވެއެވެ.

މޫޑީސް އިން ނެރުނު ބަޔާނުގައި ބުނި ގޮތުގައި މިފަދައިން ރޭޓިން ކުރި އެރުމުގެ މައިގަނޑު ސަބަބަކީ ރާއްޖޭގެ ފިސްކަލް އަދި މަނިޓަރީ ސިޔާސަތުތަކުގެ ނަތީޖާއެއްގެ ގޮތުން ރާއްޖޭގެ މެކްރޮފިސްކަލް ހާލަތު ރަނގަޅު ވުމެވެ. ބޭރު ފައިސާގެ އާމްދަނީ އިތުރުވެ، ސޮވްރިން ޑިވެލޮޕްމަންޓް ފަންޑުގައި ބޭރުފައިސާ އިތުރުވެފައިވާ ކަން ވެސް ފާހަގަކޮށްފައިވެއެވެ.

ބޭރު ފައިސާގެ ގާނޫނާއި ގަވާއިދު ތަންފީޒު ކުރުމުގެ އިތުރުން ސަރުކާރުން ބަޖެޓު ތަންފީޒު ކުރުމުގައި ހަރަދުތައް ކޮންޓްރޯލްކޮށް އަދި މިއަހަރުގެ ބަޖެޓު ޑެފިސިޓް ކުޑަކުރުމަށް ކޮށްފައިވާ މަސައްކަތްތައް ވެސް މޫޑީސް އިން ފާހަގަ ކޮށްފައިވެއެވެ.

މޫޑީސް އިން ރާއްޖެއަށް ދީފައިވާ ކްރެޑިޓް ރޭޓިން މަތިކުރުމާއި ގުޅިގެން ފިނޭންސް މިނިސްޓްރީން ބުނީ މޫޑީޒްގެ މި ނިންމުމަކީ ފާއިތުވި އަހަރުގެ ތެރޭގައި ރާއްޖެއިން ގެންގުޅެފައިވާ ހަރުދަނާ މާލީ ސިޔާސަތުތަކާއި، އަޅާފައިވާ ފިޔަވަޅުތަކުގެ ނަތީޖާ ރަނގަޅުކަމުގެ ހެއްކެއް ކަމަށެވެ. އަދި ރާއްޖޭގެ ދަރަނި ދެއްކުމުގެ ޤާބިލުކަން އިތުރުކުރުމަށް ރޭވުންތެރިކަމާއެކު ކުރަމުން އަންނަ މަސައްކަތްތަކުގެ ނަތީޖާވެސް މިކަމުން ދައްކުވައިދޭކަމަށް މިނިސްޓްރީން ބުނެ އެވެ.