ދިވެހިރާއްޖެއިން ސައުތް އެފްރިކާއަށް ދަތުރުތަށް ފަށަން އުޅޭކަމަށް އައިލެންޑް އޭވިއޭޝަންގެ މެނޭޖިން ޑިރެކްޓަރ އިބްރާހިމް އިލިޔާސް ވިދާޅުވެއްޖެއެވެ.

އިލިޔާސް "ކުރިއަށް މީޑިއާ" ވިދާޅުވީ ދަތުރުތައް ފެށުމަށް ހަމަޖެހިފައިވަނީ މިއަހަރުގެ މެދު ތެރޭގައި ކަމަށެވެ. ފުރަތަމަ ފަށާއިރު ހަފްތާއަކު އެއް ފްލައިޓުން ދަތުރުތައް ފެށުމަށް ހަމަޖެހިފައިވެއެވެ.

އޭގެ ޑިމާންޑަށް ބަލާ ދަތުރުތަކަށް އިތުރު ބަދަލުތައް ގެނައުމަށް ހަމަޖެހިފައިވާނެ ކަމަށް އިލްޔާސް ވިދާޅުވިއެވެ. އަދި މި ދަތުރުތައް ބޮޑަށް އަމާޒުވެގެންދާނީ ސައުތް އެފްރިކާގެ ޓޫރިސްޓުން ރާއްޖެ ގެނައުމަށް ކަމަށް ވިދާޅުވިއެވެ.

"އަޅުގަނޑުމެން މިއަހަރު މެދުތެރެއަށް މި މަސައްކަތްކުރަނީ ސައުތް އެފްރިކާ އެއްކަލަ ވައިޓްބޮޑީގަ އެއަރކްރާފްޓް އޮޕަރޭޓްކުރުމަށް. އެއީ ބޮޑަށް ސައުތްއެފްރިކާގެ ތޫރިސްޓުން ރާއްޖެއަށް ގެންނަން މަސައްކަތް ކުރަންވެގެން." 

"މި އަހަރު މެދުތެރޭ އަޅުގަނޑުމެން މިބަލަނީ ހަފްތާއަކު އެއް ފްލައިތުން މި ފަށަނީ. ފަށާފަ ދެން އޭގެ ޑިމާންޑަށް ބަލާފަ ދެން އަޅުގަނޑުމެން ބަދަލުތައް ގެންނާނީ," އޭނާ ވިދާޅުވި އެވެ.

ރާއްޖެއިން ސީދާ ސައުތް އެފްރިކާއަށް ދަތުރުތަށް ފެށުމުން އެގައުމުގެ ފަތުރުވެރިން ރާއްޖެ އަންނާނެކަމަށާ، ސައުތްއެފްރިކާގެ ފަތުރުވެރިންގެ މެދުގައި ދިވެހިރާއްޖެ އާންމުވެގެންދާނެކަމަށް އިލިޔާސް ދެކެވަޑައިގަންނަވައެވެ.

މީގެ އިތުރުން އިލްޔާސް ވިދާޅުވީ މިވަގުތު ސައުތްއެފްރިކާގެ ދަތުރުތަށް އޮންނަގޮތުން އެ ގައުމުގެ ޓޫރިސްޓުން ރާއްޖެ އަންނަނީ ވަރަށް ދިގު މަންޒިލަކުން ކަމަށެވެ. މިޑްލް އީސްޓް ނޫނީ ވަޔަރ ސިންގަޕޫރް ކަހަލަ ހަބެއް މެދުވެރިވެގެން ކަމަށެވެ.

"ފަތުރުވެރިން އަންނަނީ ވަރަށް ދިގު މަންޒިލަކުން މިވަގުތަށް. މިސާލަކަށް މިޑްލް އީސްޓް ނޫނީވަޔާ ސިންގަޕޫރު އެކަހަލަ، ކޮންމެސް ކަހަލަ ހަބަކުން،" އިލްޔާސް ވިދާޅުވި އެވެ.

އެމްޑީ އިލްޔާސް އިތުރަށް ވިދާޅުވީ މިދަތުރުތައް ދެގައު ދޭތެރޭ ހަމަޖެހިފައިވަނީ ސައުތް އެފްރިކާގެ ޓުއަރ އޮޕަރޭޓަރުންނާއި، އަދި ރާއްޖޭގެ ރިސޯޓްތަކާ ގުޅިގެން ކަމަށެވެ.