ރާއްޖެއިން ފަލަސްތީނުގެ ރައްޔިތުންނަށް ބައި މިލިއަން ރުފިޔާގެ ކާބޯތަކެތީގެ އެހީތެރިކަން ފޯރުކޮށްދީފިއެވެ.

އިސްލާމިކް މިނިސްޓްރީން ބުނީ ފަލަސްތީނުގެ ރައްޔިތުންނަށް ހަދިޔާކުރެވުނު ކާބޯތަކެއްޗަކީ މި އަހަރުގެ ފިތުރު ޒަކާތުގެ ގޮތުގައި ރާއްޖޭގެ ޒަކާތު ހައުސް އަށް ލިބުނު ފައިސާގެ ތެރެއިން ބަޔެއްކަމަށެވެ. 

ރާއްޖޭގެ ޒަކާތު ހައުސްއިން ޒަކާތުގެ ގޮތުގައި ލިބުނު ފައިސާގެ ތެރެއިން ބައިމިލިއަން ރުފިޔާ ހަވާލުކޮށްފައިވަނީ އިސްރާ އެސޯސިއޭޝަނާ ކަމަށް އިސްލާމިކް މިނިސްޓްރީން ބުންޏެވެ. 

އިސްލާމިކް މިނިސްޓްރީން ބުނިގޮތުގައި މިހާރު އިސްރާ އެސޯސިއޭޝަނާއި، ފަލަސްތީނުގައި ހަރަކާތްތެރިވާ އެހީދޭ ފަރާތްތައް ގުޅިގެން މި އެހީ ފަލަސްތީނުގެ ރައްޔިތުންނަށް ވަނީ ފޯރުކޮށްފީފައެވެ. މީގެ އިތުރުން އެހީދޭ ވީޑިއޯ މިނިސްޓްރީން ވާނީ އާންމުކޮށްފައި ކަމަށްވެސް ބުނެފައިވެއެވެ.

ފަލަސްތީނަށް ރާއްޖެއިން ދިން އެހީގެ ވީޑިއޯގައި އެ ގައުމުގެ ސުންނާފައިވެފައިވާ ގެތަކުގައި ދިރިއުޅޭ ރައްޔިތުންނަށް ދިވެހިންގެ ފަރާތުން ދިން އެހީ ފޯރުކޮށްދޭތަން ފެނެއެވެ. އަދި ރާއްޖޭގެ ދިދަ އާއި ފަލަސްތީނުގެ ދިދަ ޖަހާފައި ހުރިއިރު، އެހީ އަކީ ރާއްޖެއިން ދީފައިވާ އެހީކަން އެނގޭ ބެނާތައް ހަރުކޮށްފައި ހުއްޓެވެ.