ރާއްޖެ ތެރޭގައި އެޅޭ ފުރަތަމަ ދަމަނަވެށި ކުޅުދުއްފުށީގައި ގާއިމްކުރުމަށް ރޯޑް ޑިވަލޮޕްމަންޓް ކޯޕަރޭޝަން(އާރްޑީސީ ) އާ ހަވާލުކޮށްފިއެވެ.

މި ދަމަނަވެއްޓަކީ މާލެއިން ބޭރުން ރާއްޖެތެރޭގައި އެޅޭ ފުރަތަމަ ދަމަނަވެއްޓެވެ. މާލޭގައި ހިންގާ ދަމަނަވެށިން ދޭ ހުރިހާ ހިދުމަތްތަކެއް ދޭގޮތަށް ހަމަޖެހިފައިވާ މި ދަމަނަވެށި އެޅުމުގެ ޖުމްލަ އަގަކަށް 23،113،061.08 ދިވެހި ރުފިޔާ އަރާނެކަމަށް ލަފާކުރެވެއެވެ. 

ދެ ފަންގިފިލާއަކަށް އިމާރާތް ހެދުމަށް ހަމަޖެހިފައިވާއިރު ސިއްހީ އިދާރާއިން މައުލޫމާތު ހިއްސާކުރި ގޮތުގައި ވެކްސިން ދިނުމާ، ކުޑަކުދިން ހެދިބޮޑުވުމުގެ މައުލޫމާތު އެއްކުރުމާ، ޓޮބޭކޯ ސިޒޭރިއަން ހިންގުމުގެ އިތުރުން އެކި އެކި ސިއްހީ ކަންކަމާއި ގުޅޭގޮތުން ހޭލުންތެރިކަމުގެ ޕްރޮގްރާމްތައްވެސް ހިންގުމަށް ހަމަޖެހިފައިވެއެވެ.

ރޭ ބޭއްވިގެން ދިޔަ މި ރަސްމިއްޔާތުގައި ވާހަކަ ދެއްކެވީ ސިއްހީ ވަޒީރު އަބްދުއްلله ނާޒިމްއެވެ. ވަޒީރު ވިދާޅުވީ ރަށްރަށުގައި ސިއްހީ ހިދުމަތްދޭ ތަންތަނުގެ މަސައްކަތް ނިމޭއިރު އެތަންތަނުން ދެވޭ ހިދުމަތްތަކަށްވެސް ކުރިއެރުން އަންނާނެ ކަމަށެވެ.

މީގެ އިތުރުން މި ރަސްމިއްޔާތު ބޭއްވިގެން ދިޔައީ ސިއްހީ އިދާރާގައެވެ. އަދި މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ އިސްމާއިލް ޝަރީފެވެ. އަދި ރޯޑް ޑިވަލޮޕްމަންޓް ކޯޕަރޭޝަންގެ ފަރާތުން އެ އިދާރާގެ މެނޭޖިންގް ޑިރެކްޓަރ ބްރިގޭޑިއަރ ޖެނެރަލް ރިޓަރޔަރޑް އަލީ ޒުހައިރު ސޮއިކުރައްވާފައިވެއެވެ.