ރާއްޖެއަކީ މިލިއަނުން މީހުންއުޅޭ ގައުމެއްނޫން ކަމަށާއި، ދުންފަތް އެތެރެކުރުމަކީ މިފަދަ ކުޑަ ގައުމެއްގައި ކޮށްގެންވާނެ ކަމެއް ނޫން ކަމަށް ރައީސް ޑރ. މުުހައްމަދު މުޢިއްޒު ވިދާޅުވެއްޖެއެވެ. 

ރައީސް މިހެން ވިދާޅުވެފައިވަނީ ރައްޔިއްތުންނާ ވީހާވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ހިޔާލުތަކާއި ކަންބޮނޑުވުންތައް އަޑު އައްސަވައި، ރައްޔިތުންގެ ސުވާލުތަކަށް ޖަވާބުދެއްވުމަށް ކުރިއަށްގެންދާ "ރައްޔިތުންނާ އެކު" ސިލްސިލާ ޕޮޑްކާސްޓްގެ ދެ ވަނަ އެޕިސޯޑުގައި ވާހަކަފުޅުދައްކަވަމުންނެވެ.

ރައީސް ވިދާޅުވީ ސިނގިރޭޓު ބުއިމާއި، އެކި ކަހަލަ ދުންފަތުގެ އިސްތިއުމާލުން އެންމެހާ ފަރާތްތަކުންވެސް ދުރުވާންޖެހެއެވެ. އަދި މިކަމަށް އެ މަނިކުފާނު ވަނީ އެންމެހާ ފަރާތްތަކަށް ގޮވާލައްވާފައެވެ. 

ރައީސް ވިދާޅުވީ ދުންފަތުގެ ބާވަތްތަކުގެ އަގުބޮޑު ކުރުމުގެ މައިގަނޑު މަހުފޫމަކީ އެކަމުން ރައްޔިތުން ސަލާމަތްކުރުން ކަމަށެވެ. އަދި ދުންފަތުގެ އިސްތިއުމާލު ކުރުމަކީ ކިހާ ނުރައްކާތެރި ކަމެއްކަން ރައީސްގެ ވާހަކަތަކުން ކިޔާދެއްވިއެވެ.

މީގެ އިތުރުން ރައީސް ވިދާޅުވީ ދުންފަތުގެ ބާވަތްތައް ވިއްކާ އޭގެން ވިޔަފާރިކުރާ ފަރާތްތަކަށް ފަހަރަކު ތަންކޮޅެއް ޓެކްސް ބޮޑުކޮށްގެން އެކަން ހުއްޓުވުމަކީ އެކަން ވާނެކަމެއް ނޫން ކަމަށެވެ. އަދި އެހެން އެކަން ކޮށްފިނަމަ އެއީ ސިނގިރޭޓު އެތެރެކުރާ ފަރާތްތަކަށް އެއިން ބޮޑުވާބައި ހަމަޖައްސައިގެން، ވިއްކަމުންދާން ލިބޭނެ ފުރުސަތެއްކަމަށްވެސް ރައީސް ވިދާޅުވެފައިވެއެވެ. އެހެންކަމުން ދުންފަތުގެ ވިޔަފާރިކުރާ ފަރާތްތަކުން އެ ވިޔަފާރި ދޫކޮށްލައި އެހެންވިޔަފާރިއަކަށް ބަދަލުވުމަށް ރައީސްވަނީ އިލްތިމާސްކުރައްވައިފައެވެ.

މީގެ އިތުރުން ރައީސް ވަނީ އަލަށް ދުންފަތުގެ ތެރެއަށް ވަންނަ ކުދިންނަށް ޖެނެރޭޝަން ބޭންއެއް ތައާރަފްކުރާނެ ކަމަށް ވިދާޅުވެ، އެކަމުގެ ތަފްސީލްތައް ދެެއްވައިފައެވެ. އެގޮތުން 18 އަހަރާއި 25 އަހަރާއި ދެމެދުގެ އުމުރުފުރާގެ މީހުން، ނުވަތަ ޒުވާނުން އެކަމުގެ ތެރޭގައި އެހާ ގިނަ ދުވަސް ނުވަނީސް، އެ ވަބާއިން ސަލާމަތް ކުރަން ފަސޭހަވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

ޖެނެރޭޝަން ބޭން ގެންނަން ރައީސް ވިސްނަވާފައިވާ ގޮތްތައް: 

• 7 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
• - 2004 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން
• - 2000 ވަނަ އަހަރުގެ ޖެނުއަރީ 1 އިން ފެށިގެން އުފަންވީ އަދި އުފަންވާނެ ހުރިހާ ކުދިންނަށް ދުންފަތުގެ އިސްތިއުމާލު ކުރުން މަނާކުރުން

ރައީސްގެ ސިޔާސަތުގެ ދަށުން ރާއްޖޭގައި ދުންފަތުގެ އިސްތިއުމާލު ކުރާ މީހުންނަށް ވަނީ ވަރަށް ގިނަ ފިޔަވަޅުތަކެއް އަޅުއްވާފައެވެ. އެގޮތުން ވޭޕާއި އީ-ސިގިރެޓު މަނާކޮށްފައިވާއިރު، ދުންފަތުން ނަގާ ޓެކްސް ވަނީ ބޮޑުކޮށްފައެވެ.