ރާއްޖެއަށް އެތެރެ ކުރަން އުޅުނު 1.070 ކިލޯގެ ކެނަބިސް އިއްޔެ އަތުލައި ގެންފިއެވެ.

ކަސްޓަމްސްއިން ބުނެފައިވާގޮތުން އެތަކެތި އަތުލައިގެންފައިވަނީ 04 މާރިޗު 2025 ގައެވެ. އަދި މިތަކެތި ފެނިފައިވަނީ ޕޯސްޓް މެދުވެރިކޮށް ރާއްޖެ ގެނަސްފައިވާ ޕެކޭޖެއް ބަލާ ފާސްކުރުމުގެ ތެރެއިންނެވެ. 

ޕެކޭޖު ބަލާ ފާސްކުރަމުން ދިޔައިރު މަސްތުވާ އެއްޗެހިކަމަށް ޝައްކު ކުރެވިގެން އިތުރަށް ބަލާފާސް ކުރުމުން އެއީ މަސްތުވާއެއްޗެހީގެ ބާވަތެއްކަމުގައިވާ ކެނަބިސް ކަން އެނގިފައިވާ ކަމަށް ކަސްޓަމްސްއިން މަޢުލޫމާތު ލިބިފައިވެއެވެ.

މި ތަކެތީގެ ބަރުދަނުގައި 1.070 ކިލޯ ހުރިއިރު މި ތަކެތީގެ މަގުމަތީ އަގު 856،000(އަށް ލައްކަ ފަންސާސް ހަހާސް) ދިވެހި ރުފިޔާއަށް އަރާނެ ކަމަށް ލަފާކުރެވޭ ކަމަށް ކަސްޓަމްސްއިން ބުނެފައިވެއެވެ. 

މައްސަލަ އިތުރަށް ތަހުގީގު ކުރުމަށްޓަކައި އަތުލައި ގަނެވުނު މަސްތުވާތަކެއްޗާއި އެކު ޕެކޭޗް ބަލާ ދިޔަ 52 އަހަރުގެ ދިވެހި ފިރިހެނެއް ވަނީ ދިވެހި ފުލުހުންގެ ޚިދުމަތާއި ހަވާލު ކުރެވިފައި ކަމަށް ކަސްޓަމްސްއިން މަޢުލޫމާތު ދީފައިވެއެވެ.