ޑިޖިޓަލް ދާއިރާއިން ރާއްޖެއަށް އިންގިލާބީ ބޮޑު ބަދަލެއް ގެނައުމަށްޓަކައި "ދިވެހިރާއްޖެ 2.0" ސަމިޓުގައި ގާއިމްކުރާނީ ދެފުށް ފެންނަ ހަރުދަނާ ނިޒާމެއް ކަމުގައި ދާހިލީ ވަޒީރު އަލީ އިހުސާން މިރޭ ވިދާޅުވެއްޖެއެވެ.

މިނިސްޓަރ އިހުސާން މިހެން ވިދާޅުވީ، މިމަހުގެ 9 ވަނަ ދުވަހުގެ ރޭ ރައީސް ޑރ. މުހައްމަދު މުއިއްޒު އިފްތިތާހު ކުރެއްވި "މޯލްޑިވްސް 2.0" ސަމިޓުގެ ކްލޯޒިންގް ސެރެމޮނީގައި މިރޭ ވާހަކަ ދައްކަވަމުންނެވެ.

އެގޮތުން ވަޒީރު ވިދާޅުވީ ރައީސް މުޢިއްޒު މި ސަމިޓުގެ ސިޔާސަތު ގެނެސްދެއްވީ ރާއްޖެއިން ކޮރަޕްޝަންގެ ވަބާ ނައްތާލުމަށް ކަމަށާއި އެ ހާލަތު ބަދަލު ކުރެއްވުމަށް ކަމަށެވެ.

"މޯލްޑިވްސް 2.0 ގައި އަަޅުގަނޑުމެން ގާއިމް ކުރާނީ ދެފުށްފެންނަ ހާމަކަން ބޮޑު ނިޒާމެއް، އެއްވެސް ފަރުދެއް، ރަށެއް، ބާކީނުވާ ޚިދުމަތްދޭ ސިސްޓަމްތަކެއް. ދައުލަތުގެ ހުރިހާ އިދާރާތަކެއް އެއް ސިސްޓަމަކުން ގުޅިފައިވާ އެއް މައުލޫމާތެއް ދައުލަތުގެ އިދާރާތަކަށް ތަކުރާރުކޮށް ހުށަހަޅަން ނުޖެހޭ ވިއުގަތަކެއް އަަޅުގަނޑުމެން މި ގާއިމް ކުރަނީ" އިހުސާން ވިދާޅުވިއެވެ.

ރާއްޖެއަށް ޑިޖިޓަލް ޓްރާންސްފޯމޭޝަނެއް ގެނައުމަށް ކުރަމުންދާ މި މަސައްކަތް ކުރިއަށް ގެންގޮސްފައިވަނީ ރައީސް މުޢިއްޒު ޗެއާ ކުރައްވާ އަދި އެ ދާއިރާގެ ތަޖުރިބާކާރުން ހިމެނޭ ޑިޖިޓަލް ޓްރާންސްފޯމޭޝަން ކައުންސިލްގެ ދަށުންނެވެ.