ކުރީގެ ރައީސް އަބްދުﷲ ޔާމީނު އުފެއްދެވި ޕީޕަލްސް ނޭޝަނަލް ފްރަންޓު (ޕީއެންއެފް) ގެ އިސް މަގާމުތަކަށް ކުރިމަތިލާން ހުޅުވާލައިފި އެވެ.

އެ ޕާޓީން އިއްޔެ ކޮށްފައިވާ އިއުލާނެއްގައި ބުނީ ޕާޓީގެ ގައުމީ ޖަލްސާ މި މަހު 30 ގައި ބާއްވަން ނިންމާފައިވާ ކަމަށެވެ. ޕާޓީގެ ދާއިމީ މަގާމުތަކަށް މީހުން އައްޔަންކުރާނީ އެ ޖަލްސާގަ އެވެ.

ޕީއެންއެފްގެ ދާއިމީ މަގާމުތަކަށް ކުރިމަތިލާން ހުޅުވާލި ފުރުސަތު ހަމަވާނީ އޮކްޓޯބަރު 23 ވަނަ ދުވަހުގެ އިރުއޮއްސި 6:00 އާ ހަމައަށެވެ. ކުރިމަތިލާން ހުޅުވާލާފައިވަނީ ޕާޓީގެ ރައީސް، ދެ ނައިބު ރައީސުން، ސެކްރެޓަރީ ޖެނެރަލް (އެސްޖީ)، ރަޖިސްޓްރާ އަދި ހަޒާންދާރުގެ އިތުރުން 14 ސެނެޓު މެންބަރުންގެ މަގާމުތަކަށެވެ.

އިލެކްޝަންސް ކޮމިޝަން (އީސީ) ގެ ޕާޓީތަކުގެ ދަފްތަރު ދައްކާ ގޮތުން މި އަހަރުގެ ޖޫން މަހުގެ ނިޔަލަށް ޕީއެންއެފްގައި ތިބީ 3،046 މެންބަރުންނެވެ.