ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު، އިދިކޮޅު އެމްޑީޕީގެ ޕާލިމެންޓްރީ ގްރޫޕުގެ ލީޑަރު އިބްރާހިމް ނާޒިލް ހުށަހަޅުއްވައި ޕީއެންސީގެ އައްޑޫ ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގު ތާއީދު ކުރެއްވި ކުއްލި މައްސަލަ ތަޅުމުން ބޭރުކޮށްފި އެވެ.

ނާޒިލް ރައްޔިތުންގެ މަޖިލީހަށް ހުށައެޅުއްވި މައްސަލައަކީ އައްޑޫ ކަރަންޓުގެ މައްސަލަ ހައްލުވެފައި ނުވާތީ އެ މައްސަލަ ވަގުތުން ވަގުތަށް ހައްލެއް ހޯދައިދިނުން އެދި ސަރުކާރަށް ހުށައަޅާފައިވާ މައްސަލައެކެވެ.

މި މައްސަލައިގައި ބުނެފައިވަނީ އައްޑޫއިން ކަރަންޓު ކެނޑެމުން ދިއުމުގެ ސަބަބުން އެ ސިޓީގެ ރައްޔިތުންގެ އަގު ބޮޑު މުދަލަށް ގެއްލުން ވަމުންދާ ކަމަށެވެ. އަދި ރައްޔިތުން ދިރިއުޅެމުންދަނީ ހާސްކަމާއި ދަތިކަމުގެ ތެރޭގައި ކަމަށެވެ. އެހެންކަމުން މިކަމުގެ ހައްލު ވަގުތުން ވަގުތަށް ހޯދައިދިނުމަށް ކުއްލި މައްސަލައިގައި ހުށަހަޅާފައިވެ އެވެ.

ނާޒިލް އިތުރަށް ފާހަގަކޮށްފައި ވަނީ އައްޑޫ ކަރަންޓު މައްސަލަ ހައްލުކުރުމަށް ބޭނުންވަނީ 3 މެގަވޯޓުގެ ޖަނަރޭޓަރެއް ކަމަށް އައްޑޫ ސެންޓްރަލް ޕަވާ ސްޓޭޝަނުން ބުނަމުންދާ ކަމަށެވެ. ނަމަވެސް ސަރުކާރުން އެ ސިޓީއަށް ގެންދިޔައީ 1.8 މެގަވޯޓުގެ ޖަނަރޭޓަރެއް ކަމަށް ނާޒިލް ވިދާޅުވިއެވެ. އައްޑޫގެ ކަރަންޓުގެ މައްސަލަ ހައްލުކުރުމަށް ސަރުކާރުން އެކި ތާރީހުތައް ދިން ނަމަވެސް މިހާތަނަށް އެކަށީގެންވާ ހައްލެއް ގެނެސްދެވިފައި ނެތް ކަމަށް ވެސް ނާޒިލް އިތުރަށް ފާހަގަ ކުރައްވާފައިވެ އެވެ.

މި މައްސަލަ ބަލައިގަންނަން ފެނޭތޯ މިއަދުގެ މަޖިލީހުގައި ވޯޓެއް ނަންގަވާފައިވެއެވެ. ވޯޓު ދިން ފަރާތްތަކުގެ ތެރެއިން ބަލައިގަންނަން ނުފެންނަކަމަށް ވޯޓުދެއްވީ 47 މެމްބަރުންނެވެ. ބަލައިގަންނަން ފެންނަކަމަށް ވޯޓުދީފައިވަނީ 13 މެމްބަރުންނެވެ. މި 13 މެމްބަރުންގެ ތެރޭގައި ސަރުކާރު ހިންގާ ޕާޓީ ޕީއެންސީގެ ޓިކެޓުގައި މަޖިލީހުގައި އިން މެމްބަރު އަޒާން ވަނީ ހިމެނިފައި. ނަމަވެސް މައްސަލަ ބަލައިގަންނަން ނުފެންނަ ކަމަށް މަޖިލީހުގެ އަގުލަބިއްޔަތު އޮތުމުން މި މައްސަލަ މިއަދުގެ ރައްޔިތުންގެ މަޖިލީހުން ވަނީ ބަލައިނުގަނެ ބޭރުކޮށްލައިފައެވެ.

އައްޑޫ ކަރަންޓުގެ މައްސަލައަށް ހައްލެއް ހޯދައިދިނުމުގެ ގޮތުން މި ސަރުކާރުން އެ ސިޓީއަށް 1.8 މެގަވޯޓުގެ ޖަނަރޭޓަރެއް ގެންގޮސް ބޭނުންކުރަން ފަށާފައިވެއެވެ. އަދި އެ މައްސަލައަށް ހައްލު ނުލިބުމުން ސަރުކާރުންވަނީ އިތުރު 1.8 މެގަވޯޓުގެ ޖަނަރޭޓަރެއް މިހަފްތާ ތެރޭގައި އައްޑޫއަށް ފޮނުވާނެ ކަމަށް ވިދާޅުވެފައެވެ. އަދި އެކަން ވަނީ އެ ސިޓީގެ ކަރަންޓްގެ ހިދުމަތް ދެމުން އަންނަ ފެނަކައިން މައުލޫމާތު ދީފައެވެ.