ޕީއެންސީގެ ކައުންސިލަރުންނަކީ ވަޒީފާގެ ޒިންމާ އަދާ ކުރެވޭ ބައެއް ނޫން ކަމަށް މާލޭގެ މޭޔަރު އާދަމް އާޒިމް ވިދާޅުވެއްޖެ އެވެ.

އެމްޑީޕީން ބޭއްވި ބައްދަލުވުމެއްގައި އާޒިމް ވިދާޅުވީ މާލެ ކައުންސިލުގެ މެޖޯރިޓީ އޮތީ ޕީއެންސީ ކަމަށްވާއިރު އެ މެޖޯރިޓީއޮވެމެ ޕީއެންސީގެ ކައުންސިލަރުންނަށް އެއްްވެސް މަސައްކަތެއް ނުކުރެވޭ ކަމަށެވެ. 

''ވަޒީފާ އަށް އާދެވެނީކީ ނުން، ހެނދުނު އާދެވެނީކީ ނޫން، އަތް ދަށަށް ޖަހާފައި ގޭގައި ތިބޭ ބައެއް'' އާޒިމް ވިދާޅުވީ މަޖިލީހުގެ މެޖޯރިޓީވެސް ޕީއެންސީގައި އޮތް ނަމަވެސް ރައްޔިތުންނަށްޓަކައި އެ ޕާޓީއަށް އެއްވެސް ކަމެއް ކޮށްނުދެވޭ ކަަމަށެވެ.

އޭނާ ސިފަކުރެއްވި ގޮތުގައި ޕީއެންސީގެ މެންބަރުންނަކީ ވަރަށް ފަރުވާކުޑަ އަދި ވިޔާނުދާ ބަޔެކެވެ. އާޒިމް ވިދާޅުވީ ރައްޔިތުންނަށް ހެޔޮ އެދޭ ހަމައެކަނި ޕާޓީއަކީ އެމްޑީޕީ ކަމަށެވެ. އަދި އެކަން އެމްޑީޕީން ސާބިތުކޮށްދީފައިވާ ކަމަށެވެ. 

އާޒިމް ޕީއެންސީއަށް ވަރަށް ބޮޑަށް ފާޑުވިދާޅުވެފައިވާއިރު، މޭޔަރުކަމުގެ ދެވަނަ ދައުރަކަށް އޭނާ ވަނީ ކުރިމަތިލައްވާފައެވެ. އާޒިމްއާ ޕީއެންސީން ވާދަކުރަނީ ކުރީގެ ޑިފެންސް މިނިސްޓަރު މޫސާ ޖަލީލް އެވެ.