ޕެންޝަން އޮފީހުގެ ޗީފް އެގްޒެކެޓިވް އޮފިސަރު (ސީއީއޯ) ސުޖާތާ ހަލީމް  އެމަޤާމުން އިސްތިއުފާ ދެއްވައިފި އެވެ.  

އިސްތިއުފާ ދެއްވިކަން ސުޖާތާ ވަނީ ''ކުރިއަށް'' ޔަގީންކޮށްދީފަ އެވެ. ''މިއަދު އިސްްތިއުފާ ދިނީ'' ސުޖާތާ ވިދާޅުވި އެވެ. 

އިސްތިއުފާ ދެއްވި ސީދާ ސަބަބެއް ސުޖާތާ ވިދާޅެއްނުވެ އެވެ. އެކަމަކު އޭނާ އިސްތިއުފާ ދެއްވާފައިމިވަނީ ޕެންޝަން ފަންޑުން އިންވެސްޓުކޮށްފައި ހުރި 2.4 ބިލިއަން ރުފިޔާގެ ބޮންޑު އެމްއެމްއޭއަށް ވިއްކާލުމަށް ފަހު އެ ފައިސާ ބޭނުންކޮށްގެން ސަރުކާރުގެ ބޮންޑަކަށް އިންވެސްޓުކުރަން ޕެންޝަން އޮފީހުގެ ބޯޑުން ނިންމާފައި ވަނިކޮށެވެ.

ރޭ ޕޭންޝަން އޮފީހުން ނެރުނު ބަޔާނެއްގައި ބުނީ ސަރުކާރުގެ ބޮންޑަށް އިންވެސްޓު ކުރަނީ މޯލްޑިވްސް ރިޓަޔަރމަންޓް ޕެންޝަން ސްކީމުން މިހާތަނަށް އިންވެސްޓް ކޮށްފައިވާ ބޮންޑުތަކުގެ ތެރެއިން 2.4 ބިލިއަން ރުފިޔާގެ ބޮންޑު ސެކަންޑަރީ މާކެޓުގައި ވިއްކާލައިގެން ލިބޭ ފައިސާއިން ކަމަށެވެ. 

ބޮންޑު ވިއްކާލައިގެން ލިބޭ ފައިސާ ޕެންޝަން އޮފީހުން އިންވެސްޓުކުރަނީ ދިވެހި ފައިސާ އާއި އެމެރިކާ ޑޮލަރުން ފައިދާ ލިބޭ ބޮންޑަކަށް ކަމަށް ބަޔާނުގައި ބުންޏެވެ.