ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ގެ ރައީސްކަމަށް މާލީ ވުޒާރާގެ ނައިބު ވަޒީރަކަށް ހުންނެވި މުހައްމަދު އަނަސް އައްޔަންކުރައްވައިފި އެވެ. 

ރައީސް އޮފީހުން ބުނީ މި މަގާމަށް އަނަސް އައްޔަންކުރައްވާފައި ވަނީ މިއަދު ކަމަށެވެ. 

މުޙައްމަދު އަނަސް އަކީ ޤައުމީ ޔުނިވާސިޓީއިން މާސްޓާ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ ބޭފުޅެކެވެ. 

އަނަސް މީގެ ކުރިން އަދާކުރައްވާފައިވާ ވަޒީފާތަކުގެ ތެރޭގައި މާލީ ވުޒާރާގެ ނައިބު ވަޒީރު ކަމުގެ އިތުރުން، ހައުސިންޑިވެލޮޕްމަންޓް ކޯރޕަރޭޝަންގެ އޮޑިޓް މެނޭޖަރުކަން، މޯލްޑިވްސް ބިޒްނަސް ސްކޫލުގެ އެސޯސިއޭޓް ޕްރޮފެސަރުގެ މަގާމު ހިމެނެ އެވެ.

މި މަގާމަށް ބޭފުޅަކު އައްޔަންކޮށްފައި މިވަނީ، މީގެ ކުރިން މި މަގާމުގައި ހުންނެވި ހަމްދީ އަގީލް،  މިދިޔަ ފެބްރުއަރީ މަހު 13ގައި ވަކިކުރުމުންނެވެ. ހަމްދީ އަގީލް އައްޔަންކުރީ 22 ނޮވެމްބަރު 2023 ގައެވެ.