އިހަވަންދިއްޕޮޅުގައި ފަށާފައިވާ ބައިނަލްއަގުވާމީ ބަންކަރިންގެ ހިދުމަތާއި ގުޅިގެން އެކި ހިދުމަތްތައް ދިނުމަށް ހއ. އުލިގަމުގައި އިމިގްރޭޝަންގެ އާ އޮފީހެއް އަޅަން އެމްޓީސީސީއާ މިއަދު ހަވާލުކޮށްފި އެވެ.

އިމިގްރޭޝަނުން ބުނި ގޮތުގައި މިއީ ބަންކަރިންގެ ހިދުމަތާއި ގުޅިގެން، ބޭރު ގައުމުތަކުން ރާއްޖެ އަންނަ އުޅަނދުފަހަރުގެ ދަތުރުވެރިންނާއި ފަޅުވެރިންނަށް އިމިގްރޭޝަން ކްލިއަރެންސްދީ އިމިގްރޭޝަން ހިދުމަތްތައް ފޯރުކޮށްދިނުމަށްޓަކައި އަޅާ އާ އިމާރާތެެކެވެ.

އުލިގަމުގައި މިހާރު ފޯރުކޮށްދޭ އިމިގްރޭޝަންގެ ހިދުމަތަކީ، ދެ އޮފިސަރުން މެދުވެރިކޮށް ފޯރުކޮށްދެމުންދާ ސީޕޯޓުގެ ހިދުމަތްތައް އެކަންޏެވެ.

އެމްޓީސީސީން އަޅާ އާ އިމާރާތާއެކު، ޕާސްޕޯޓާއި ވިސާ ފަދަ އެހެނިހެން އިމިގްރޭޝަންގެ ހިދުމަތްތައް ލުއިފަސޭހަކަމާއެކު ފޯރުކޮށްދެވި، އިހަވަންދިއްޕޮޅުގައި އިމިގްރޭޝަންގެ ހިދުމަތްތައް އިތުރަށް ފުޅާވެ، ތަރައްގީވެގެންދާނެ ކަމަށް އިމިގްރޭޝަންއިން ބުންޏެވެ.

ދުނިޔޭގައި ބަންކަރިންގެ ހިދުމަތުގައި ކުރިއަރާފައިވާ ވިޓޯލް ކުންފުންޏާ ގުޅިގެން އިހަވަންދިއްޕޮޅުގައި ބަންކަރިންގެ ހިދުމަތް ފެށީ މިދިޔަ ސެޕްޓެމްބަރު މަހެވެ.