އުރީދޫ އިން އަންނަ އަހަރު ޕޭޕަލްގެ ހިދުމަތް ރާއްޖެއަށް ތައާރަފުކުރަން ހަމަޖެހިފައިވާ ކަން މިއަދު އިއުލާންކޮށްފި އެވެ.

އުރީދޫން މިއަދު އިއުލާންކުރި ގޮތުގައި އެ ހިދުމަތް ރާއްޖެއަށް ތައާރަފުކުރަނީ އަންނަ އަހަރުގެ އޭޕްރިލް މަހު އެވެ. 

އުރީދޫން ބުނީ ޕޭޕަލްގެ ހިދުމަތް ގަބޫލުކުރާ ދުނިޔޭގެ އެތައް ފަރާތްތަކަކާ އެކު، ފައިސާގެ މުއާމަލާތްތައް ރާއްޖޭގައި ތިބެގެން ކުރެވޭނެ ކަމަށެވެ.

އޭރުން އުރީދޫގެ އެމްފައިސާ އެކައުންޓްތައް މެދުވެރިކޮށް ޕޭޕަލް ހިދުމަތް ލިބޭނެ ކަމަށް އުރީދޫން ބުންޏެވެ.

އުރީދޫގެ ސީއީއޯ ހާލިދު އަލް ހަމާދީ ވިދާޅުވީ ފިންޓެކް އަދި ޕޭޕަލްގެ ޕާޓްނާޝިޕާއެކު ޕޭޕަލް ވޮލެޓްތައް އެމްފައިސާ ވޮލެޓްތަކާ ލިންކްވެގެން ދިއުމަކީ ވިޔަފާރިތަކާއި އަމިއްލަ ފަރުދުންނަށް ލިބޭނެ ބޮޑު ކުރިއެރުމެއް ކަމަށެވެ.