ބާސެލޯނާގެ ތަރި ޑެނި އޮލްމޯއަށް އަނިޔާވެ، ޗެމްޕިއަންސް ލީގުގައި ޖަރުމަނުގެ ބަރޯޝިއާ ޑޯޓުމަންޑާ ދެކޮޅަށް ކުޅޭ ފުރަތަމަ ލެގުގެ މެޗު އޭނާއަށް ގެއްލިދާނެކަމުގެ ބިރު ހީވެއްޖެއެވެ.

ރޭ ބާސެލޯނާގެ އަމިއްލަ ދަނޑުގައި އޮސަސޫނާއާ ދެކޮޅަށް ކުޅުނު މެޗުގައި އޮލްމޯއަށް އަނިޔާވެ ވަނީ ބަދަލުކޮށްފައެވެ.

އެ މެޗުގައި އޮލްމޯ ވަނީ ގޯލު ވެސް ޖަހައިފައެވެ. ޕެނަލްޓީ އަކުނއ ގޯލު ޖެހިތާ މާ ގިނަ އިރެއް ނުވެ މެޗުގެ ފުރަތަމަ ހާފުގައި އޭނާ ވަނީ ބާލައިފައެވެ.

ބާސެލޯނާގެ މެޑިކަލް ޓީމާ ހަވާލާދީ މީޑިއާ ރިޕޯޓުތައް ބުނާ ގޮތުގައި އޮލްމޯގެ އަނިޔާއާއެކު ދެ ހަފުތާއަށް އޭނާ ކުޅުމާ ދުރަށް ދާނެއެވެ. 

ބާސެލޯނާގެ މެދު ތެރޭގައި މޮޅު ކުޅުމެއް ދަކަމުންއަންނަ އޮލްމޯއަަށް އަނިޔާވީ ކުރިއަށް އެ ޓީމަށް މުހިންމު މެޗުތަކެއް ހުއްޓައެވެ. އެގޮތުން މާދަމާ ރޭ ގިރޯނާއާ ދެކޮޅަށް ލީގުގައި ކުޅޭއިރު، އަންނަ ބުދަ ދުވަހުގެ ރޭގައި އެތުލެޓިކޯ މެޑްރިޑާ ދެކޮޅަށް ރަށުން ބޭރުގައި ކޮޕަޑެލްރޭ ސެމީ ފައިނަލްގެ ދެވަނަ ލެގު އެ ޓީމު ކުޅޭނެއެވެ. އަދި އަންނަ މަހުގެ 9 ވަނަ ދުވަހުގެ ރޭ ޗެމްޕިއަންސް ލީގުގައި އެ ޓީމު ކުޅޭނެއެވެ.

މި ސީޒަންގައި ފޯމުގައި އޮތް ބާސެލޯނާއިން ހަތަރު ތަށި ހޯދުމަށް ވަނީ އަމާޒު ހިފައިފައެވެ. ލީގުގެ އެއްވަނައިގައި އޮތް ބާސެލޯނާއިން ވަނީ މި ސީޒަންގައި ސްޕެނިޝް ސުޕަ ކަޕް ކާމިޔާބުކޮށްފައެވެ. އަދި ޗެމްޕިއަންސް ލީގު ކުއާޓާ ފައިނަލްގައި އޮތް އެ ޓީމަކީ މިފަހަރު ޗެމްޕިއަންސް ލީގުގެ ފޭވަރިޓުންނެވެ. އަދި އެ ޓީމު އޮޮތީ ކޮޕަޑެލްރޭގެ ސެމީ ފައިނަލްގައެވެ.

މި ސީޒަނުގައި ބާސެލޯނާއަށް ގެނައި އޮލްމޯ އަކީ ލެއިޕްޒިގް އިން 6.5 މިލިއަން ޑޮލަރަަށް ގެނައި ކުޅުންތެރިއެކެވެ. ނަމަވެސް އޮލްމޯ ޓީމަށް ރެޖިސްޓާ ކުރެވިފައިވަނީ ވަރަށް އުނދަގުލުންނެވެ. 

ބާސެލޯނާއިން އޮލްމޯ ގެނެސް ޓީމަށް ރަޖިސްޓާ ކުރި ނަމަވެސް ލަލީގާއިން ވަނީ ބާސެލޯނާގެ މުސާރައިގެ ކެޕްގެ ކަންކަމާއި މާލީ ހާލަތަށް ބަލާއިރު، ކޮންޓްރެކްޓްގެ މުއްދަތާއި މުޅި ޓްރާންސްފާ އަށް ހިނގާ ހަރަދަށް ބަލާއިރު، ބާސެލޯނާ ގަވާއިދަށް ނުފެތޭތީ އޮލްމޯގެ ރެޖިސްޓްޜޭޝަން ބާތިލުކޮށްފައެވެ. 

ދެވަނަ ފަހަރަށް އޮލްމޯ ރަޖިސްޓާ ކުރަން ޓީމުގެ މާލީ ހާލަތު ރަނގަޅުކޮށް، ކުރަންޖެހޭ ކަންކަ ބާސެލޯނާއިނއ ފުރިހަމަ ކުރުމުން މާލީ މައްސަލަތަކެއްގައި އެއް ސީޒަނެއްގައި ކޮންޓްރެކްޓް އާއި ރަޖިސްޓްރޭޝަން ކެންސަލްވި ކުޅުންތެރިއަކަށް އެ ސީޒަނެއްގައި ދެ ވަނަ ފަހަރަށް ރަޖިސްޓްރޭޝަން ފުރިހަމަ ކުރަން ތަނެއް ނުދޭނެކަމަށް ބުނެ އޮލްމޯގެ ރެޖިސްޓްރާ ކުރަން ދެކޮޅު ހަދައިފައެވެ.