އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ ސެކްރެޓަރީ ޖެނެރަލް ހިސެއިން ބްރަހިމް ތާހާ މިއަދު ރާއްޖެއަށް ވަޑައިގެންފި އެެވެ.

ތާހާ ރާއްޖެއަށް ވަޑައިގެންނެވީ 'ސައުދީ-މޯލްޑިވްސް އިންޓަނޭޝަނަލް ފޯރަމް އޮން އިންޓެގްރިޓީ' (އައިިއެފްއައި) ގައި ބައިވެރިވެވަޑައިގަތުމަށެވެ. މި ފޯރަމް އަކީ ރާއްޖޭގެ އެންޓި ކޮރަޕްޝަން ކޮމިޝަން (އޭސީސީ) އާއި ސައޫދީ އަރަބިއްޔާގެ އޯވާސައިޓް އެންޑް އެންޑް އެންޓި- ކޮރަޕްޝަން އޮތޯރިޓީ (ނަޒާހާ) އިންތިޒާމުކޮށްގެން ކުރިއަށްގެންދާ ފޯރަމެކެވެ.

މި ފޯރަމް ކުރިއަށް ގެންދިއުމުގެ މަގުސަދަކީ ފަތުރުވެރިކަމުގެ ދާއިރާގައި ނަޒާހަތްތެރިކަން އިތުރުކޮށް، ކޮރަޕްޝަނުގެ ހިރާސް ކުޑަކުރުމެވެ.

ރާއްޖޭގެ އެންޓިކޮރަޕްޝަން ކޮމިޝަނުން ބުނީ މި ފޯރަމްގެ ތެރެއިން އޯއައިސީ އާއި އެ ކޮމިޝަނާއި ދެމެދު އޮންނަ ގުޅުން އިތުރަށް ވަރުގަދަ ކުރުމަށް މަޝްވަރާތައް ކުރުމަށް ހަމަޖެހިފައިވާ ކަމަށެވެ.

ރާއްޖެއަކީ 1967 އިން ފެށިގެން އޯއައިސީގެ ހަރަކާތެރި މެންބަރެއްގެ ގޮތުގައި އިސްލާމީ ދުނިޔޭގެ އެއްބައިވަންތަކަމަށް ވަކާލާތުކޮށް އެ ޖަމިއްޔާގެ އެކި މަޝްރޫއުތަކުގައި ބައިވެރިވަމުން އަންނަ ގައުމެކެވެ.