އެމެރިކާގެ ޓައިމްސް މެގެނިޒުން ހޮވި ސިއްހީ ދާއިރާގެ ނުފޫޒުގަދަ 100ގެ ލިސްޓުގައި ރައީސް ޑރ. މުހައްމަދު މުއިއްޒު ހިމެނުމުން ދުނިޔޭގެ ސިއްހަތު ޖަމިއްޔާ އިން އެ ކަމަށް އެ މަނިކުފާނަށް ވަރަށް ތައުރީފުކޮށްފި އެވެ. 

ދުނިޔޭގެ ސިއްހަތު ޖަމިއްޔާ، ވޯލްޑް ހެލްތު އޮގަނައިޒޭޝަން (ޑަބްލިއުއެޗްއޯ) އިން ސޯޝަލް މީޑިއާގައި ބުނީ ބަލިތަކުން ދުރާލައި ރައްކާތެރިވުމާއި އާންމު ސިއްހަތާ ގުޅޭ ކަންކަން ކުރިއަރުވަން އެ މަނިކުފާނު ކުރެއްވި ބުރަ މަސައްކަތްޕުޅުގެ އަގުވަޒަންކުރެވިގެން ދިޔަ ކަމެއް ކަމަށެވެ. 

އެ ތަނުން ވަނީ ރާއްޖޭގެ ސަރުކާރުން ކުރަމުން އަންނަ މިފަދަ މަސައްކަތްތަކަށް އެއްބާރުލުން ދިނުމުގައި ދެމިއޮންނާނެ ކަމުގެ ޔަގީންކަން ވެސް ދީފަ އެވެ. 

ރައީސްގެ ނަން ލިސްޓުގައި ހިމަނާފައި ޓައިމްސް މެގެނިޒުން އިން ވެސް އެންމެ ބޮޑަށް ފާހަގަކޮށްފައިވަނީ ރައީސްގެ ސިއްހީ ބައެއް ސިޔާސަތުތަކާއި ދުންފަތާއި ދެކޮޅަށް އެމަނިކުފާނު އެޅުއްވި ފިޔަވަޅުތަކެވެ. 

މީގެ ތެރޭގައި، ޖެނުއަރީ 2007 ގެ ފަހުން އުފަންވި އަދި އުފަންވާ އެއްވެސް މީހަކަށް ދުންފަތް މަނާކޮށް ތަންފީޒުކުރައްވާފައިވާ ޖެނެރޭޝަނަލް ބޭން އާއި، ވޭޕް އާއި އީ ސިގިރޭޓު މަނާކުރުން ފާހަގަކޮށްފައިވެ އެވެ.