ރައީސް އޮފީހުގެ ތަރުޖަމާނު ހީނާ ވަލީދު ނޫސްވެރިންގެ ސުވާލުތަކަށް ޖަވާބު ނުދެއްވައި، ޕްރޮގްރާމްތައް ހުށަހަޅައިދޭތީ ނޫސްވެރިންގެ ފާޑުކިޔުން އަމާޒުވެއްޖެ އެވެ.

ހޮނިހިރު ދުވަހު ''ތަރުޖަމާނާއެކު'' ގެ ނަމުގައި ހީނާ ވަނީ ޕްރޮގްރާމެއް ފަށާފަ އެވެ. އެ ޕްރޮގްރާމްގެ ފުރަތަމަ އެޕިސޯޑުގައި މެހެމާނެއްގެ ގޮތުން ބައިވެރިވަވަޑައިގެންނެވީ އިކޮނޮމިކް މިނިސްޓަރ މުހައްމަދު ސައީދު އެވެ.

އެކަމަށް ފާޑުކިޔައި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) ގެ ރައީސް އަހުމަދު ނާއިފު އެކްސްގައި ކުރި ޕޯސްޓެއްގައި ބުނީ، ޕޮޑްކާސްޓެއް ހުށަހަޅަން ސަރުކާރުގެ ތަރުޖަމާނަށް ވަގުތު ލިބުނު ނަމަވެސް ނޫސްވެރިންނަށް ޖަވާބު ދޭނެ ވަގުތު ނުލިބުމަކީ ހިތާމަ ހުރި ކަމެކެވެ.

''އެންމެ އިސްކަން ދޭން ޖެހޭނީ މީޑިއާގެ ސުވާލުތަކަށް ޖަވާބު ދިނުމާއި ސަރުކާރުގެ މައުލޫމާތު ހިއްސާކުރަން، އެކަމަކު އަޅުގަނޑުމެން (ނޫސްވެރިން) ޖެހެނީ މައުލޫމާތު ހޯދަން ސަލާން ޖަހަން'' ނާއިފް ބުންޏެވެ.

ސަން އޮންލައިންގެ އެޑިޓަރު އަހުމަދު އިނާހު އެކްސް ގައި ބުނީ މި ސަރުކާރަކީ ވަކި މިސްރާބެއް އޮތް ސަރުކާރެއް ނޫން ކަމަށާއި، ތަރުޖަމާނަށް ދައުލަތުން މުސާރަ ދެނީ މީޑިއާގެ ސުވާލުތަކަށް ޖަވާބު ދޭން ކަމަށެވެ.

''ޓީވީ ޕްރޮގްރާމްތައް ހުށަހަޅާކަށެއް ނޫން މުސާރަ ދެނީ، ހަވާލުކޮށްފައިވާ ޒިންމާ އަދާކުރޭވޭ'' ނޫސްވެރިން ބޭނުންވާ މައުލޫމާތު ދޭން ސަރުކާރުން ނުކުޅެދިފައިވާ ކަމަށް އިނާހު ބުންޏެވެ.

''ސަރުކާރުގެ ތަރުޖަމާނުގެ މަސްއޫލިއްޔަތަކީ ޕްރޮގްރާމް ހުށަހަޅައިދިނުމާއި ސޯޝަލް މީޑިއާގައި ޕޯސްޓުކުރުންތޯ؟'' އެމްޖޭއޭގެ ނައިބް ރައީސް އަދި އަދަދު ނޫހުގެ ނޫސްވެރިޔާ މުހައްމަދު ޝަހުޒާން އެކްސް ގައި ކުރި ޕޯސްޓެއްގައި ބުންޏެވެ. 

އަދަދު ނޫހުގެ ވެރިޔާ ހުސެއިން ފިޔާޒު މޫސާ އެކްސްގައި ކުރި ޕޯސްޓެއްގައި ވިދާޅުވީ ތަރުޖަމާނުގެ ހައިބަތު ހީނާ ގެއްލުވާލާފައިވާ ގެއްލުވާލާފައިވާ ކަމަށެވެ. 

ނޫސްވެރިންގެ ސުވާލުތަކަށް ހީނާ ޖަވާބު ނުދޭ ކަމަށް ބުނެ ފާޑުކިޔުންތައް އަމާޒުވެފައިވާއިރު، ރައީސް ޑރ. މުހައްމަދު ވެސް ނޫސްވެރިންނާ ބައްދަލުނުކުރައްވާތާ 8 ވަރަކަށް ވަނީ ވެފަ އެވެ.