ހައި ކޯޓުގައި އެންމެ ގިނަ ދުވަސްވީ މުހައްމަދު ނިޔާޒު ފަނޑިޔާރު ކަމުން މިއަދު ރިޓަޔާކުރައްވައިފި އެވެ.

ޝަރަފުވެރިކަމާއެކު ފަނޑިޔާރުކަމުގެ މަގާމުން މިއަދު  ވަކިވެވަޑައިގެންނެވިކަން ހައި ކޯޓުގެ ރަސްމީ އެކްސް އެކައުންޓުން ކުރި ޕޯސްޓެއްގައި ހާމަކުރި އެވެ.

ނިޔާޒް ހައިކޯޓުގެ ފަނޑިޔާރު ކަމުގެ ހުވާކުރެއްވީ، 2018 ވަނަ އަހަރުގެ ޖެނުއަރީ މަހުގެ 25 ވަނަ ދުވަހުއެވެ.

ނިޔާޒްވަނީ ޖޭއެސްސީގެ ނާއިބު ރައީސްކަން މިދިޔަ އަހަރުގެ މާޗު މަހުގެ 20 ވަނަ ވަނަ ދުވަހުން ފެށިގެން، 22 އޮކްޓޫބަރުއާ ހަމައަށް ފުރުއްވައިފަ އެވެ.

ނިޔާޒް ކުރިން ފުރުއްވާފައިވާ މަގާމުތަކުގެ ތެރޭގައި، ހދ. ޖުޑީޝަލް ދާއިރާގެ އިސް މެޖިސްޓްރޭޓްކަމާއި، ހދ. ވައިކަރަދޫ ކޯޓުގެ މެޖިސްޓްރޭޓްކަން ހިމެނެއެވެ. އޭގެ އިތުރުން މިނިސްޓްރީ އޮފް ޖަސްޓިސްގެ ލީގަލް އެސިސްޓެންޓްކަން ވެސް އޭނާ އަދާ ކުރެއްވި އެވެ.

ނިޔާޒަކީ މެލޭޝިއާގެ އިންޓަނޭޝަނަލް އިސްލާމިކް ޔުނިވާސިޓީއިން ޝަރީއަތާއި ގާނޫނުގެ ރޮނގުން މަތީ ތައުލީމު ހާސިލު ކުރައްވައިގެން ހުންނެވި ބޭފުޅެކެވެ.

އޭނާ ޖޭއެސްސީގެ ނައިބު ރައީސް ކަމުން ވަކިވުމުގެ ކުރިން ސުޕްރީމް ކޯޓުގެ ފަނޑިޔާރުންތަކެއް ވަކިކުރަން ސަރުކާރުން އުޅުނު މައްސަލާގައި ނިޔާޒު ވޯޓު ދެއްވީ އެ ފަނޑިޔާރުންނާ އެއްކޮޅަށެވެ.

މި ފަހުން ކޮމިޝަނުގެ ނައިބު ރައީސް ކަމުން ވަކިވި ފަހުން ބައެއް މައްސަލަތައް ޖޭއެސްސީން ބަލަން ފެށި އެވެ.