މިހާރު އޮލިމްޕަސް ސިނަމާގައި ދައްކަމުންދާ ދިވެހި ފިލްމު "ލިލީ" ގެ އެންމެ ފަހު ޝޯ މިރޭ އޮންނާނެ އެވެ.

ލިލީ" އޮލިމްޕަހުގައި ދައްކަން ފެށީ މިދިޔަ ނޮވެމްބަރު މަހުގެ 20 ވަނަ ދުވަހު އެވެ. ފިލްމަށް ޑިމާންޑު  ދަންވަރު ޝޯތަކެއްވެސް ހައުސްފުލްކޮށް ވަނީ ދައްކައިފަ އެވެ.

މައިވަންތަކަމުގެ ލޯބިން މަހުރޫމުވެފައިވާ ފުރާވަރު އަންހެން ކުއްޖެއްގެ ދިރިއުޅުން ބަދަލުވެގެންދާ ގޮތް ކިޔައިދޭ އަސަރުގަދަ ވާހަކައެއްގެ މައްޗަށް އުފައްދާފައިވާ "ލިލީ" އަކީ އަޒްހާން އިބްރާހިމް ލިޔެ ޑައިރެކްޓު ކޮށްފައިވާ ފިލްމެކެވެ.

މިފިލްމުގެ މައިގަނޑު ތަރިންގެ ތެރޭގައި ހިމެނެނީ އައިޝާ އަލީ، އަހުމަދު ޝާރިފް، މުހައްމަދު އިޝްފާންގެ އިތުރުން މަރިޔަމް ޝިމާ އެވެ. މީގެ އިތުރުން އަހުމަދު ނިމާލް، މަރިޔަމް ހަލީމްގެ އިތުރުން އަލީ ފާރޫގުވެސް ފިލްމުން ފެނެ އެވެ. މިހާރު ސިނަމާގައި ދައްކަމުންދާ ޑައިރެކްޓާޒް ކަޓުގައި މަގުބޫލު އެކްޓަރު ޔޫސުފް ޝަފީއު (ޔޫއްޕެ) ގެ ސީންއެއްވެސް ވަނީ ހިމަނައިފަ އެވެ.

ފިލްމުގެ ފަހު ޝޯ މިރޭ އަޅުވަން ނިންމާފައިވާއިރު، ފިލްމުގެ ތަރިންގެ ތެރޭގައި ހިމެނޭ ނިމާލް އަށް ސްޓްރޯކެއް ޖެހުމުގެ ސަބަބުން އޭނާގެ ހާލު ސީރިޔަސް އެވެ.