ހދ. ނޭކުރެންދޫ ބަނދަރުގެ ތަރައްޤީ ކުރުމުގެ މަޝްރޫއު ނިމުމުން އެރަށަށް ދިމާވެފައިވާ ލަފާފުރުމުގެ މައްސަލައަށް ބޮޑު ހައްލެއް ލިބިގެންދާނެ ކަމަށް ސަރުކާރުން ވަނީ ލަފާ ކޮށްފަ އެވެ.

އެމްޓީސީސީ އާ ހަވާލުކޮށްގެން ކުރިއަށްގެންދާ މި މަޝްރޫއުގެ %31 މިހާރު ނިމިފައިވާ ކަމަށް އިމާރާތްކުރުމުގެ ވިޒާރާއިން ވަނީ ބުނެފަ އެވެ.

ޖުމްލަ އާބާދީގައި 1745 މީހުން ދިރިއުޅޭ ނޭކުރެންދޫގެ ބަނދަރު ތަރައްގީ ކުރުމުގެ މަސައްކަތް އެމްޓީސީސީއާ ހަވާލު ކޮށްފައިވަނީ 2022 ވަނަ އަހަރުގެ އޮކްޓޯބަރު މަހު ތެރޭގަ އެވެ. އެއް އަހަރު ދުވަސް ތެރޭގައި މި މަސައްކަތް ނިންމާ ގޮތަށް ހަވާލު ކުރިނަމަވެސް މި މަޝްރޫއުގެ އަމަލީ މަސައްކަތް ފެށިފައިވަނީ އޭގެ 10 މަސް ފަހުން 2023 ވަނަ އަހަރުގެ އޮގަސްޓު މަހުގަ އެވެ.

ލަފާފުރުމުގެ ދަތިކަން ފޯރާފައިވާ ނޭކުރެންދޫގެ ބަނދަރުގެ މަސައްކަތް އަވަހަށް ނިންމުމަކީ އެ ރަށު ރައްޔިތުންގެ ވަރަށް ބޮޑު އުންމީދެކެވެ. 

އިމާރާތް ކުރުމާބެހޭ ވުޒާރާ އިން ބުނީ ނޭކުރެންދޫ ބަނދަރުގެ އެއްގަމު ތޮށީގެ މަސައްކަތް އެއްކޮށް ނިމިފައިވާއިރު މިހާރު ކުރިއަށްދަނީ ހިނގާ ދުވާރުގެ މަސައްކަތް ކަމަށެވެ.

ދައުލަތުގެ ބަޖެޓުން 48 މިލިޔަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މިމަޝްރޫއުގެ ދަށުން ނޭކުރެންދޫގައި 212 މީޓަރުގެ އެއްގަމު ތޮއްޓަކާއި، 166 މީޓަރުގެ ރިވެޓްމަންޓަކާއި ބޮޑުހިލައިގެ ބޭރު ތޮއްޓެއްލުމާއި ރޭމްޕެއް ހެދުމަށްވަނީ ހަމަޖެހިފައެވެ.