ނޭޝަނަލް ސެންޓަ ފޯ އާޓްސް (އެންސީއޭ) އިން އާޓިސްޓުންނަށް ހާއްސަކޮށްގެން "ފައިނޭންޝިއަލް އެއިޑް" އާ ގުޅޭ ހަރަކާތެއް ކުރިއަށްގެންދަން ނިންމައިފިއެވެ. 

އެންއޭސީގެ ފޭސްބުކް ޕޭޖުން މިއަދު ކޮށްފައިވާ ޕޯސްޓެއްގައި ބުނީ، އެ ސެންޓަރުން ކުރިއަށް ގެންދަން އުޅޭ ހަރަކާތުގައި ބައިވެރިވުމަށް ހުރިހާ އާޓިސްޓުންނަށް ދައުވަތު އަރުވާ ކަމަށެވެ. އެގޮތުން އެ ހަރަކާތުގައި އާޓިސްޓުން ބައިވެރިވެ، ކޮފީ މޭޒުން އެ މީހުންގެ ހިޔާލު ހިއްސާކުރުމުގެ ފުރުސަތު އޮންނާނެ ކަމަށެވެ. 

މީގެ އިތުރުން އާޓިސްޓުންނާ ގުޅިގެން އެ ހަރަކާތް ކުރިއަށް ގެންދިއުމަކީ އެ އިދާރާއިން އެންމެ އެދޭ ގޮތްކަމަށްވެސް އެންސީއޭއިން ބުނެފައިވެއެވެ. 

އެންސީއޭއިން ބުނި ގޮތުގައި، އެ ސެންޓަރުން އަލަށް ބާއްވާ "ފައިނޭންޝިއަލް އެއިޑް" ހަރަކާތް އޮންނާނީ އަންނަ ބުދަ ދުވަހުގެ ރޭ 8:30 އިން :10:00 އަކަށް "ޔޫތް ތާޑް ސްޕޭސް، މުލީއާގެ ބާ ގަރާޖު" ސަރަހައްދުގައި ކަމަށެވެ. 

އެންއޭސީން އަންނަނީ ރާއްޖޭގެ އާޓިސްތުންނަށް އެކި ކަހަލަ ޕްލެޓްފޯމްތަކުގެ ފުރުސަތު ހުޅުވާލުމުގެ މަސައްކަތް ކުރަމުންނެވެ. އެގޮތުން އެ ސެންޓަރުން ވަނީ އާޓިސްޓުންގެ ކުރިއެރުމަށް މިދިޔަ އަހަރުވެސް ގިނަ މަސައްކަތްތަކެއް ކޮށްފައެވެ.