އައްޑޫ މީދު އާއި ހުޅުދޫ އަދި ފޭދޫގައި ވަކިވަކި ކައުންސިލްތައް އުފެއްދުމާ މެދު އެ ތިން ރަށުގެ ރައްޔިތުންގެ ފެންނަ ނުފެންނަ ގޮތް ބަލަން ބާއްވާ ވޯޓުލުން ފަށައިފި އެވެ.

އެ ވޯޓުލުން ހެނދުނު 8 ގައި ފަށާފައިވާއިރު ހަވީރު 4 އަށް ޖެހުމާ ހަމަޔަށް ވޯޓުލުން ކުރިއަށްދާނެ އެވެ.

އިލެކްޝަންސް ކޮމިޝަން (އީސީ) އިން ބުނީ މި ހިޔާލު ހޯދަން ނަގާ ވޯޓުގައި ފޭދޫއިން 4،355 މީހަކަށް މި ވޯޓުލުމުގެ ހައްގު ލިބޭއިރު، ހުޅުދޫން 2،874 މީހަކަށް އަދި މީދޫން 2،347 މީހަކަށް ވޯޓުލުމުގެ ހައްގު ލިބޭ ކަމަށެވެ.

މި ރެފަރެންޑަމަށް މާލެ އާއި އައްޑޫގެ ތިން ރަށުގައި 18 ވޯޓު ފޮށި ބަހައްޓާނެ އެވެ. އެއީ ހުޅުދޫގައި 3 ފޮށި މީދޫގައި 3 ފޮށި، ފޭދޫގައި ފަސް ފޮށި އަދި މާލޭގައި ދިރިއުޅޭ އެ ތިން ރަށުގެ މީހުންނަށް 7 ވޯޓު ފޮއްޓެވެ.

ވޯޓު ގުނަން ފަށާނީ ވޯޓު ނަގާ ނިމޭތާ 30 މިނެޓުގެ ހުސްވަގުތުކޮޅަކަށް ފަހުގަ އެވެ. ވޯޓުގެ ވަގުތީ ނަތީޖާ އިއުލާން ކުރާނީ މިއަދު އައްޑޫގަ އެވެ. އަދި ދާއިމީ ނަތީޖާ އިއުލާން ކުރާ ގޮތަށް ނިންމާފައި ވަނީ އަންނަ އާދިއްތަ ދުވަހު އެވެ.