އޭއެފްސީ އޭޝިއަން ކަޕް ކޮލިފައިންގައި ދިވެހިރާއްޖެ އާއި ތަޖިކިސްތާން ބައްދަލުކުރި މެޗުން ރާއްޖެ ބަލިވެއްޖެ އެވެ.

އެ މެޗުން ރާއްޖެ ބަލިވީ 0-3 އިންނެވެ. 

މެޗުގައި ގޯލުތައް މަބަޓްޝައޭވް ޝެރްވޯނީ 2 ގޯލް ޖެހިއިރު 3 ވަަނަ ގޯލު ޖެހީ ސަފަރޯވް މަނޫޝެއިރު  އެވެ.

މެޗު ފަށައިގެން ނިމެންދެން ބޯޅަ ހިފެހެއްޓީ ތަޖިކިސްތާނުންނެވެ. އެ ޓީމުން މެޗު ކާމިޔާބުކުރީ ވަރަށް ހަމަޖެހިލައިގެން ފުރުސަތުތައް ހޯދައިގެންނެވެ. 

މެޗުގެ ދެވަނަ ހާފުގެ ކުރީކޮޅު އަލީ ފާސިރު (ސެންޓޭ) އާއި މުހައްމަދު ނައިގެ ފަރާތުން ރަނގަޅު ފުރުސަތުތަކާއި ހަމަލާތަކެއް ގޯލާ ދިމާއަށް ފޮނުވާލި އެވެ.

ރާއްޖޭން ތަޖިކިސްތާނުގެ ގޯލަށް ބޮޑަށް ނުރައްކާ ކޮށްލެވުނީ ފަހު 10 މިނެޓުގަ އެވެ. ޒުވާން ބައެއް ކުޅުންތެރިންނަށް ފުރުސަތު ދިން ވަގުތު ރަނގަޅު ހަމަލާތަކެއް އުފެއްދި ނަމަވެސް ތަޖިކިސްތާނު ކީޕަރު ވަނީ ހަމަލާތައް މަތަކޮށްފަ އެވެ.

ކޮލިފައިންގައި ރާއްޖެ ދެން ކުޅޭނީ އަންނަ މަހު 18 ވަނަ ދުވަހު ގަލޮޅު ދަނޑުގައި ފިލިޕީންސާއާ ދެކޮޅަށެވެ.