މަރުކަޒީ ބޭންކު (އެމްއެމްއޭ)އިން ހުޅުމާލޭގައި އާ އޮފީހެއް އެޅުމަށް ކޮންސަލްޓެންސީ ދޭނެ ބަޔަކު ހޯދަން އިއުލާންކޮށްފި އެވެ. 

އެމްއެމްއޭއިން ކުރި އިއުލާނުގައި ބުނީ، ހުޅުމާލޭގައި އަޅާ މި އޮފީހުގެ ޑިޒައިންގެ މަސައްކަތާއި އިމާރާތްކުރުމުގެ މަސައްކަތަށް ކޮންސަލްޓެންސީ ދޭނެ ފަރާތެއް ހޯދަން ބޭނުންވާކަމަށެވެ. 

ކޮންސަލްޓެންސީ ދޭނެ ފަރާތެއް ހޯދަން އިއުލާންކޮށްފައި ވަނީ ބިޑު އުސޫލުންނެވެ. ބިޑަށް ރަޖިސްޓްރީ ކުރުމަށް އެކްސްޕްރެޝަން އޮފް އިންޓަރެސްޓު (އީއޯއައި) ހުށަހަޅާނީ އެ އޮތޯރިޓީގެ އީމެއިލްއަށެވެ. އީއޯއައި ހުށަހެޅުމުގެ އެންމެ ފަހު ވަގުތަކީ އަންނަ މަހުގެ 10ވަނަ ދުވަހުގެ 11:00ގެ ކުރިއެވެ.

އެމްއެމްއޭގެ އާ އޮފީސް އިމާރާތް ހުޅުމާލޭގައި ގާއިމްކުރުމަށް ނިންމިކަމުގެ ވާހަކަތަކެއް މިދިޔަ އަހަރުގެ ތެރޭގައި ފެންމަތިވި އެވެ. މިދިޔަ އަހަރުގެ ތެރޭގައި އެމްއެމްއޭއިން ވަނީ ހުޅުމާލެއިން ޖެހިޖެހިގެން އޮންނަ ދެ ބިން ގަނެފަ އެވެ. 

މިއީ މިހާރު އެމްއެމްއޭ އިމާރާތް ހުންނަ ސަރަހައްދު ކާރޫބާރޫ ބޮޑު ކަމުންނާއި އެހެން އިމާރާތަކާ އިން ވެގެން ހުންނާތީ، ސެކިއުރިޓީ އިންތިޒާމުތައް ހަމަޖައްސަން ދަތިވާތީ ކުރާ ކަމެއް ކަމަށް އެ އިދާރާއިން ކުރިން ބުނެފައިވެ އެވެ.

އެމްއެމްއޭން ގަތް ބިން އޮންނަނީ ހުޅުމާލޭ ފޭސް އެކެއްގައި ހުންނަ ސެންޓްރަލް ޕާކުގެ ހުޅަނގަށް ވާގޮތަށް، ކޭ ޕާކު ފްލެޓުތަކާ ޖެހިގެންނެވެ.

މިހާރު ބޭނުންކުރަނީ އެ އިދާރާ އުފެދުނީއްސުރެން ބޭނުންކުރަމުން އައި މަޖީދީ ބިލްޑިން ތަޅާލުމަށް ފަހު އެޅި އިމާރާތަކެވެ. މި އިމާރާތް ބޭނުންކުރަން ފެށީ 2008 ގަ އެވެ.