ޑރ.ވިޓާލީ ލިއުބިވޮމް މިފްކޯގެ ސީއީއޯ ކަމުގެ މަގާމުން އިއްޔެ ވަކިކޮށްފިއެވެ. 

ޑރ.ވިޓާލީ އަކީ ސަރުކާރުގެ މަސް ކުންފުނި މިފްކޯއަށް ހަމަޖެއްސެވި ފުރަތަމަ ރާއްޖޭން ބޭރުގެ ސީއީއޯ އެވެ. އޭނާ މަގާމުން ވަކި ކޮށްފައި މިވަނީ މަގާމަށް އައްޔަން ކުރިތާ ގާތްގަނޑަކަށް ތިން މަހެއްހާ ދުވަސް ފަހުންނެވެ.

ކްރައިސިސް މެނޭޖްމަންޓްގެ ދާއިރާއިން 20 އަހަރުގެ ތަޖުރިބާ އާއި އެކު އިކޮނޮމިކްސް އާއި ޕަބްލިކް އެޑްމިނިސްޓްރޭޝަންގެ ދާއިރާއިންވެސް ޑރ. ވިޓާލީ ޕީއެޗްޑީ ނަންގަވާފައިވެއެވެ.

ޑރ.މުޢިއްޒުގެ ސަރުކާރު އައިފަހުން ފުރަތަމަ މިފްކޯގެ ސީއީއޯ ކަމަށް ހަމަޖައްސަވާފައިވަނީ " އަހުމަދު ޝަމާހު ރަޝީދު" އެވެ. ނަމަވެސް އޭނާގެ މަށްޗަށް ތުހުމަތުވި ކޮރަޕްޝަންގެ މައްސަލަތަކެއް ބެލުމަށްފަހު ސަރުކާރުން މިދިޔަ އަހަރުގެ މެއި މަހު އޭނާ ވަނީ މަގާމުން ވަކި ކުރައްވާފައެވެ.

އެއަށްފަހު މިފްކޯގެ އެމްޑީ އަދި ސީއީއޯގެ މަގާމު ހުސްކޮށް އޮތުމަށްފަހު ސީއީއޯ ކަމުގެ މަގާމަށް ޑރ.ވިޓާލީ އައްޔަން ކުރެއްވީ 9ޑިސެމްބަރ2024 ގައެވެ.

 މިއާއެކު އިއްޔެ ޕީސީބީން އެކްސްގައި ކުރި އިޢުލާނުގައި ވާގޮތުން ޑރ.ވިޓާލީ މަގާމުން ވަނީ ވަކިކޮށްފަ އެވެ. ނަމަވެސް ކުއްލިގޮތަކަށް މި ނިންމުން ނިންމެވި ސަބަބު ބަޔާންކޮށްދީފައެއް ނުވެއެވެ.