ހައްޖުގެ އަޅުކަން އަދާކުރުމަށް، މޯލްޑިވްސް ހައްޖު ކޯޕަރޭޝަނަށް ފައިސާ ދައްކައި ހަލާސްކުރުމަށް ފަހު ކިއުގައި ތިބި މީހުންގެ ތެރެއިން، މިއަހަރު ދެވޭނެކަމަށް ކަނޑައަޅާފައިވާ އެންމެންނަށް ހައްޖަށް ދެވޭނެކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. 

އެކްސްގައި ޕޯސްޓުކުރައްވަމުން ރައީސް ވިދާޅުވީ، މިއަހަރުގެ ކިއުގައި ތިބި އެންމެންނަށް ހައްޖަށް ދެވޭނެ ކަމަށާއި، މިއީ އަހަރުތަކަކަށް ފަހު މިގޮތަށް ކިއުގައި ތިބޭ އެންމެންނަށް ހައްޖަށް ދިއުމަށް ފުރުސަތު ދެވޭ ފުރަތަމަ ފަހަރު ކަމަށެވެ. 

ކޮންމެ އަހަރަކު ވެސް ސައުދީން ރާއްޖެއަށް ދޫކުރަނީ ގާތްގަނޑަކަށް 1000 ހައްޖު ކޯޓާ އެވެ. ސައުދީ ސަރުކާރުން ކޯޓާ ދޫކުރަނީ ގައުމުތަކުގެ އާބާދީ އަށް ބަލައިގެންނެވެ. 

ހައްޖު ކޯޕަރޭޝަނުން މީހުން ހައްޖަށް ފޮނުވަމުން ދަނީ، ފައިސާ ދައްކާ ތަރުތީބުންނެވެ. އަދި ކޮންމެ އަހަރަކު ވެސް ބޮޑެތި ބަލިތަކަށް ބޭސްކުރާ މީހުންނާއި، އުމުރުން ދުވަސްވީ މީހުންނަށް އަވަސް ފުރުސަތު ދިނުމަށް މަސައްކަތް ކުރެ އެވެ. 

ރާއްޖެއަށް ލިބޭ ކޯޓާއާއި އަޅައި ބަލާއިރު، ކޮންމެ އަހަރަކު ވެސް ހައްޖަށް ދިއުމަށް އެދި ފައިސާ ދައްކާ މީހުންގެ އަދަދު އިތުރެވެ. މިކަމުގެ ސަބަބުން ގިނަ އަހަރުތަކެއް ވަންދެއް ކިއުގައި ތިބެން ޖެހޭ މަންސަލައަކީ އާންމުންގެ ގިނަ ބައެއްގެ ކަންބޮޑުވުމެވެ. 

މިއަހަރު ހައްޖަށް ދާން ކިއުގައި ހިމަނާފައިވާ އެންމެންނަށް ހައްޖަށް ދެވޭނެކަމުގެ ޔަގީންކަން ސަރުކާރުން ދީފައިވާއިރު، މިއަހަރުގެ ކިއުގައި ތިބި އަދަދެއް އަދި ހާމައެއް ނުކުރެ އެވެ. ހައްޖު ކޯޓާ އިތުރުކޮށް، ހައްޖަށް ދިއުން އަގުހެޔޮކުރުމަކީ މި ސަރުކާރުން ކުރަމުން އަންނަ މަސައްކަތެކެވެ.