ފިތުރު އީދު ދުވަސްކަމުން މިއަދު ހަވީރު މާލޭގެ މަގުތަކުގައި ވެހިކަލް ދުއްވުން މަނާކުރުމަށް ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން ނިންމައިފިއެވެ. 

ދަތުރުފަތުރާއި މަދަނީ އުދުހުންތަކާއި ބެހޭ ވުޒާރާއިން  ބުނީ ކުރީ އަހަރުތަކެކޭ އެއްގޮތަށް މި އަހަރުވެސް ހަވީރު 16:00 އިން 18:00އަށް އެއްގަމު އުޅަނދުފަހަރު ދުއްވުން މަނާވާނެކަމަށެވެ. އަދި މިއަދުގެ ހަވީރު 16:00 އިން ރޭގަނޑު 23:00 އާއި ދެމެދު ގްރޭޓާ މާލެ ސަރަހައްދުގައި ބަރު އުޅަނދު ދުއްވުމަކީވެސް މަނާކަމެއް ކަމުގައި އެ ވުޒާރާއިން ބުންޏެވެ. 

މަނާ ގަޑިތަކުގައި ދުއްވަން ހުއްދަ އޮތް އުޅަނދުތަކަކީ ސަލާމަތީ ބާރުތަކުން ބޭނުންކުރާ އިންޖީނުލީ އެއްގަމު އުޅަނދުތަކާއި އެމްބިއުލޭންސް އާއި ފުރާ މީހުން ބޭނުންކުރުމަށް ހުއްދަ ދެވިފައިވާ އުޅަނދުތަކާއި ހާއްސަ އެހީއަށް ބޭނުންވާ މީހުން ދުއްވާ އުޅަނދުތަކާއި ޕަބްލިކް ޓްރާންސްޕޯޓްގެ ގޮތުގައި ދެމުން އަންނަ ބަހުގެ ހިދުމަތުގެ އިތުރުން އެ ގަޑީގައި ދުއްވުމުގެ ހުއްދަދެވޭ އުޅަނދުކަމަށް އެ ވުޒާރާއިން ބުނެފައިވެއެވެ. 

މި ފިތުރު އީދުގައި ބޭއްވުމަށް ހަމަޖެހިފައިވާ ހަރަކާތްތަކުގެ ތެރޭގައި މުޅި ރާއްޖެ ދިއްލާލުމަށް ލައިޓްތައް ވަނީ ރާއްޖޭގެ އެކި ރަށްރަށުގެ އިތުރުން މާލެ ސަރަހައްދުގައިވެސް ހަރުކުރެވިފައެވެ. މީގެ އިތުރުން ސަރުކާރުގެ ވުޒާރާތަކާއި އެކި މުއައްސަސާތަކުގެ އިތުރުން ސަރުކާރު ހިއްސާވާ ކުންފުނިތައް ގުޅިގެން އީދު ދުވަހުގެ ހަވީރު ފޯރިގަދަ ހަރަކާތްތަކެއް ބޭއްވުމަސް ހަމަޖެހިފައިވެއެވެ. އެގޮތުން މާލޭގައި އިހުގެ ކުޅިވަރުތަކާއި ސަގާފަތް ދައްކާލުމަށް ހަމަޖެހިފައިވެއެވެ. އަދި ފިއުޝަން ޝޯއެއް ބޭއްވުމަށް ހަމަޖެހިފައިވެއެވެ. 

އެމްއެންޑީއެފްގެ ހާއްސަ ހަރަކާތެއްވެސް މިއަދު އޮންނާނެއެވެ. އެ ހަރަކާތް ކުރިއަށްދާނީ ސަލްޓަން ޕާކާއި ޖުމްހޫރީ މައިދާން ސަރަހައްދުގައެވެ.