ފިތުރު އީދު ފާހަގަކުރުމުގެ ގޮތުން ބާބާ ގާޑިޔާއިން ފުވައްމުލަކުގައި ހަވާ އަރުވަން ތައްޔާރުވެއްޖެ އެވެ. 

ފުވައްމުލަކާއި މުޅި ރާއްޖެއަށް ވެސް މަޝްހޫރުކަން ހޯދާފައިވާ ބާބާ ގާޑިޔާގެ ވެރިޔާ ހަސަން އަތީގް ބުނީ، ހަވާ އެރުވުން އޮންނާނީ މިމަހުގެ 30 ވަނަ ދުވަހުގެ ރޭ 9 ޖަހާއިރު ކަމަށެވެ. މިއީ ބާބާ ގާޑިޔާގެ ފަރާތުން ގަނެގެން ކުރިއަށް ގެންދާ ޕްރައިވެޓް ހަރަކާތެއް ކަމަށް އޭނާ ބުންޏެވެ. 

އަތީގް ބުނި ގޮތުގައި އީދު ދުވަހުގެ ރޭ ހަވާ އެރުވުން ފަސް މިނެޓަށް ކުރިއަށް ގެންދާނެ އެވެ. މި ހަރާކާތް ކުރިއަށް ދާނީ ބާބާ ގާޑިޔާގެ އާންމު ލޮކޭޝަން، ދަނޑިމަގު ފުޓުބޯޅަދަނޑު ސަރަހައްދުގައި ކަމަށާއި، ހަވާ އެރުވުމުގެ މަންޒަރުތައް ބަލާލުމަށާއި، ބާބާ ގާޑިޔާގެ އުފެއްދުންތަކާއި ހިދުމަތްތައް ތަޖުރިބާކޮށްލުމަށް ވީހާވެސް ގިނަ ބަޔަކު އެ ސަރަހައްދަށް ދިއުމަކީ އަތީގްގެ އެދުމެކެވެ. 

މި ހަރަކާތުގެ އިތުރުން، އިތުރު ކަންތައްތަކެއް ވެސް ރާވަމުން އަންނަ ކަމަށް އަތީގް ބުންޏެވެ. އެކަމަކު އެކަންކަން އަދި ބާއްވާނީ "ސަޕްރައިޒެއް"ގެ ގޮތުގާ ކަމަށް އޭނާ މައުލޫމާތު ދިނެވެ. 

ބާބާ ގާޑިޔާއަކީ އެތަނުގެ އުފެއްދުންތަކާއި، މެހެމާންދާރީގެ ފުރިހަމަކަމުން ގިނަ ބައެއްގެ މެދުގާ މަގުބޫލު ފުޑް ސްޓޯލެކެވެ.