ކޮންމެ އަހަރަކުވެސް ކުރިއަށްގެންދާ އީދު ބައިބަލާ ޗެލެންޖުގެ މި އަހަރުގެ އެޑިޝަން ތަފާތުވާނެކަމުގައި އެ މުބާރާތް އިންތިޒާމުކުރާ ބައިބަލާ އެސޯސިއޭޝަން މޯލްޑިވްސް (ބީއޭއޯއެމް)އިން ބުނެފި އެވެ.

ޒުވާނުންގެ ވުޒާރާގެ ޑެޕިއުޓީ މިނިސްޓަރު އަދި ބީއޭއޯއެމްގެ އެކްސްކޯ މެންބަރެއްކަމުގައިވާ މުހައްމަދު އަސީލް "ކުރިއަށް" ނޫހަށް މިރޭ ވިދާޅުވީ، މި ފަހަރު ބައިބަލާ ރިންގު ހުންނާނީ ވަށައިގެން ފެންސު ޖަހާފައި ކަމަށާއި ނަމަވެސް އެހެން އަހަރުތަކާ ހިލާފަށް ރިންގަށް ބަދަލުތަކެއް ގެންނާނެ ކަށެވެ. 

"ކުރީ ފަހަރުތަކަށްވުރެ ސްޓޭޑިއަމްވެސް ކުޅޭ ތަންވެސް ތަފާތުވާނެ ފުދޭ ވަރަކަށް. މި ފަހަރުގެ ބައިބަލާ އެރީނާ ތައްޔާރުކުރަމުން މިދަނީ މީގެ ކުރިން އަދި ރާއްޖެ ނުފެންނަ ކަހަލަ ސްޓައިލަކަށް" އަސީލް ވިދާޅުވިއެވެ.

އަސީލް ވިދާޅުވީ، އެރީނާ މި ފަހަރު ހުންނާނީ މަތިންވެސް ވީޑިއޯ ކުރެވޭ ގޮތަށް ކަމަށެވެ. އަދި ބައިބަލާ އެރީނާގެ ވަށައިގެން ސްކްރީން ބަހައްޓާނެ ކަމަށާއި ކޮޅަށް ތިބެގެންވެސް ސާފުކޮށް މެޗުތައް ބަލާލެވޭނެ ކަމަށް ވިދާޅުވި އެވެ. އެކަމުގެ މައިގަނޑު ބޭނުމަކީ ވީހާވެސް ގިނަ ބަޔަކަށް އެ މުބާރާތުގެ މެޗުތައް ބެލުމުގެ ފުރުސަތު ދިނުން ކަމަށް އޭނާ ވިދާޅުވިއެވެ.

"ވީހާވެސް ގިނަ އޯޑިއަންސަކަށް ފެންނާނެ ގޮތަކަށް، އެތެރޭވެސް ގިނަ އޯޑިއަންސަކަށް މި ފަހަރު ހުންނާނީ. ކުރިން ވެއްޖެއްޔާމު ސީޓިންގެ މައްސަލަތައްވެސް އާދޭ. ސީޓިން މަދުވުމާއި އެކަހަލަ އިޝޫތައްވެސް އާދޭ. އެކަމަކު މި ފަހަރު ސީޓިންތަކާ އެއްޗެހިވެސް އޭގެ އިޝޫއެއް ނާންނާނެ. ކޮޅަށް ތިބެގެންވެސް ދުރަށް ފެންނާނެ ގޮތަށް މި ފަހަރު ވަށައިގެންވެސް ސްކްރީންވެސް ހުންނާނެ، މަތިންވެސް ފެންނަ ގޮތަށް ހުންނާނީ މި ފަހަރު ހަދާފައި" އަސީލް ވިދާޅުވިއެވެ.

އަސީލް ވިދާޅުވީ، މިހާތަނަށް މުބާރާތުގައި ބައިވެރިވާން އެ ދިފައިވަނީ ގާތްގަނޑަކަށް ތިރީހަކަށް ޓީމުން ކަމަށާއި ކުރިއަށް އޮތް ދުވަސްތަކުގައި އެ އަދަދު އިތުރުވުން އެކަށީގެންވާ ކަމަށެވެ.

އަސީލް އިތުރަށް ވިދާޅުވީ، އެ މުބާރާތް ކުރިއަށްގެންދަނީ ގިނަ ބައެއްގެ އެހީތެރިކަމާ އެކު ކަމަށާއި އުންމީދަކީ މި ފަހަރުވެސް ރަނގަޅު އަދި ތަފާތު މުބާރާތެއް ބޭއްވިގެން ދިއުންކަމަށެވެ. ހާއްސަ ގޮތެއްގައި މި މުބާރާތް ބޭއްވުމަށް ކުޅިވަރު ވުޒާރާއިން ވެދެއްވާ އެހީތެރިކަމާއި ސަރުކާރުގެ އެއްބާރުލުން އޭނާ ފާހަގަކުރެއްވިއެވެ.