އަނިޔާގެ ސަބަބުން ވޯލްޑްކަޕް ކޮލިފައިންއަށް އާޖެންޓީނާ ގައުމީ ޓީމު ނެގި ސްކޮޑުން އެ ޓީމުގެ އިތުބާރު ފޯވާޑު ލައުޓާރޯ މާޓިނޭޒް ސްކޮޑުން ބާކީކޮށްފިއެވެ.

ލައުޓާރޯއަށް އަނިޔާވީ އާޖެންޓީނާ ގައުމީ ޓީމާއެކު ފަރިތަކުރުންތައް ކުރިއަށް ގެންދަނިކޮށެވެ.

އޭނާއަށް އަނިޔާވެގެން ސްކޮޑުން ބާކީކުރިއިރު އެ ޓީމުގެ ކެޕްޓްން އަދި ޓީމުގެ އެންމެ މުހިންމު އެއް ކުޅުންތެރިޔާ ލިއޮނަލް މެސީ ވެސް ވަނީ އަނިޔާގެ ސަބަބުން ގައުމީ ސްކޮޑުން ބާކީކޮށްފައެވެ.

އެންމެ ފަހުގެ ވޯލްޑްކަޕް ޗެމްޕިއަން ހޯދި އާޖެންޓީނާ ގައުމީ ޓީނުގެ ކުރީގައި އެންމެ މުހިންމު ދައުރެއް އަދާކުރި ދެ ކުޅުންތެރިންނަކީ މެސީއާއި ލައުޓާރޯއެވެ.

އެ ދެ ކުޅުންތެރިން ނުލައި އާޖެންޓީނާއިން އަންނަ ހަފުތާގައި ވޯލްޑްކަޕް ކޮލިފައިންގައި ދެ މެޗު ކުޅުމަށް ވަނީ ހަމަޖެހިފައެވެ.

ފުރަތަމަ މެޗުގައި އަންނަ ހޮނިހިރު ދުވަހުގެ ރޭ އާޖެންޓީނާ ނިކުންނާނީ އުރުގުއާއީއާ ދެކޮޅަށެވެ. އަންނަ ހަފުތާގެ ބުދަ ދުވަހުގެ ރޭ އެ ޓީމުން ނިކުންނާނީ ބްރެޒިލްއާ ދެކޮޅަށެވެ.

ވޯލްޑްކަޕް ކޮލިފައިންގެ ދެކުނު އެމެރިކާ ކޮލިފައިން ގްރީޕްގެ އެއްވަނައިގައި އާޖެންޓީނާ އޮތީ ކުޅުނު 12 މެޗުން 25 ޕޮއިންޓު ހޯދައިގެންނެވެ. ދެވަނައިގައި އުރުގުއާއީ އޮތީ 20 ޕޮއިންޓާއެކުއެވެ. 

އުރުގުއާއީ އަތުން މޮޅުވެގެން އާޖެންޓީނާއަށް 2026 ވަނަ އަހަރުގެ ވޯލްޑްކަޕުގެ ޖާގައެއް ކަށަވަރުވާނެއެވެ.