ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ހިމެނޭހެން 8 މީހަކު ހައްޔަރުކޮށް ބަންދުގެ މުއްދަތު އިތުރުކުރި މައްސަލަ އިންޓަނޭޝަނަލް ލޭބަ އޮގަނައިޒޭޝަން (އައިއެލްއޯ) އަށް މޯލްޑިވްސް ޑިމޮކްރެޓިކް ޕާޓީން ހުށަހަޅައިފި އެވެ.

އެމްޑީޕީން އައިއެލްއޯގައި އެދިފައިވަނީ މަސައްކަތްތެރިންގެ ހައްގުތައް ހިމާޔަތްކޮށް ދިނުމަށެވެ. އަދި އެ ހައްގުތައް ކުރިއެރުވުމަށް މަސައްކަތްކުރާ ފަރާތްތަކަށް ރައްކާތެރިކަން ކަށަވަރުކުރުމަށް އަޅަންޖެހޭ ފިޔަވަޅުތައް ވީހާވެސް އަވަހަށް އަޅައިދިނުމަށެވެ.

އަދި ހަމައެއާއެކު މަސްވެރިންނަށް ދިމާވެފައިވާ މައްސަލަތަކަށް ހައްލު ހޯދައިދިނުމުގެ ގޮތުން ހެޔޮ ނިޔަތުގައި މަސްވެރިންގެ މަންދޫބުންނާ އެކު މަޝްވަރާކުރުމަށް ސަރުކާރަށް އަންގައިދިނުމަށް ވެސް އެދިފައިވާ ކަމަށް އެމްޑީޕީން ބުންޏެވެ.

ބޮޑު ކަންނެލި މަސްވެރިން ކުރަމުންދާ މުޒާހަރާގެ ތެރެއިން މައުރޫފް ހައްޔަރުކުރީ މިދިޔަ ބުރާސްފަތި ދުވަހު އެވެ. މައުރޫފް، އައިޖީއެމްއެޗުގައި ކުއްލި ސާޖަރީއެއް ކޮށްފައިވާއިރު، ފުލުހުންގެ ބަންދުން އިއްޔެ އޭނާ ވަނީ ދޫކޮށްލައިފަ އެވެ.

މާލޭ ކައިރީގައި ބޮޑު ކަންނެލި މަސްވެރިން ކުރަން ފެށި މުޒާހަރާ ގައި ގާތްގަނޑަކަށް 50 ދޯނި ބައިވެރިވި އެވެ. އެ މުޒާހަރާގައި މަސްވެރިން ކުރަމުން އަންނަ ޑިމާންޑަކީ ސަރުކާރުން ވެފައިވާ ވައުދުތައް ފުއްދުމެވެ.

މައުރޫފްގެ އިތުރުން ދެ މަސްވެރިންނާ 4 ބިދޭސީން ހައްުޔަރުކުރި އެވެ.