އިދިކޮޅު މައި ޕާޓީ އެމްޑީޕީގެ ވަގުތީ ޗެއާޕާސަންގެ މަގާމަށް ބޭފުޅަކު ހޮވުމަށް ރޭ ބޭއްވި ބައްދަލުވުން ހޫނުވެ، ވަކި ގޮތެއް ނުނިމި ގައުމީ މަޖިލިހުގެ ޖަލްސާ ހުއްޓާލައިފި އެވެ.

އެމްޑީޕީގެ ޗެއާޕަސަން ފައްޔާޒު އިސްމާއިލް އިސްތިއުފާ ދެއްވުމާ ގުޅިގެން ވަގުތީ ޗެއާޕާސަން އެއް އައްޔަންކުރުމަށްޓަކައި ރޭ ބައްދަލުވުން ކުރިއަށް ގެންދިޔައިރު ޗެއާޕާސަންގެ މަގާމަށް ކުރިމަތިލެއްވީ ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު އެވެ. އައްޑޫ ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމް ވެސް އެ މަގާމަށް ޝައުގުވެރިކަން ފާޅުކުރައްވާފައިވެ އެވެ. 

ޗެއާޕަސަނަކަށް ވަހީދުގެ ނަން އައީ ކުރީގެ ރައީސް މުހައްމަދު ނަޝީދުގެ ފެކްޝަން ހުށަހެޅިއިރު އަސްލަމްގެ ނަން ހުށަހަޅަން މަސައްކަތްކުރީ ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނުންނެވެ.

އެނގިފައިވާ ގޮތުން ރޭގެ ބައްދަލުވުމުގައި ވަގުތީ ޗެއާޕާސަން ކަމަށް ވަހީދު އައްޔަން ކުރަން ފެންނަ ކަމަށް 47 މީހަކު ވޯޓު ދިނެވެ. އެކަމަކު އަސްލަމްގެ ނަން ހުށަހަޅަން އިދިކޮޅު ފެކްޝަނުން ފުރުސަތެއް ނުދިނުމުން އަސްލަމްގެ ނަމަށް ވޯޓަށް ނޭހުނެވެ. އެއާއެކު ދެ ފެކްޝަނުގެ ދެމެދު އަރާރުން ބޮޑުވެ ބައްދަލުވުން ނިންމާލީ އެވެ.