އިދިކޮޅު އެމްޑީޕީން އޮކްޓޫބަރު މަހުގެ 3 ވަނަ ދުވަހު ކުރިއަށް ގެންދިޔަ މުޒާހަރާގައި ފުލުހުންގެ ވާޖިބު އަދާކުރަން ހުރަސްއެޅި 3 މީހަކަށް ދައުވާކުރަން ޕްރޮސެކިއުޓާ ޖެނެރަލް (ޕީޖީ) އޮފީހަށް ހުށަހަޅައިފި އެވެ.

އެ ރޭގެ މުޒާހަރާގައި ފުލުހުންނާ އެމްޑީޕީގެ ސަޕޯޓަރުންނާ ދެމެދު ކުރިމަތިލުންތަކެއް ހިނގި އެވެ. މުޒާހަރާގެ ބައިވެރިންގެ ތެރެއިން 15 މީހަކު ފުލުހުންގެ ބެލުމުގެ ދަށަށް ގެންދިޔަ އެވެ. ފަހުން އެ މީހުން ވަނީ ދޫކޮށްލާފަ އެވެ. 

އެ މުޒާހަރާގައި ފުލުހުންގެ ދައުރަށް ހުރަސްއެޅިކަމުގެ ތުހުމަތުގައި ދައުވާކުރަން ފޮނުވާފައިވަނީ ކެންދޫ ދާއިރާގެ މެންބަރު މައުރޫފް ޒާކިރު އާއި މާލޭ ސިޓީ ކައުންސިލްގެ ހުޅުމާލޭ އުތުރު ދާއިރާގެ ގޮނޑިއަށް އެމްޑީޕީން ވާދަކުރާ ފާތުމަތު ޒަހިއްޔާ (ޒާޔާ) ގެ އިތުރުން ނ. ހޮޅުދޫ، މާފޮޅޭވިލާ، އަބްދުއްސަލާމް އަށެވެ.

އެ 3 މީހުންނަށްވެސް ދައުވާކުރަނީ ޢައިރު ގާނޫނީ އެއްވުމެއް ރޫޅާލުމަށް އުޅޭ މީހާއަށް ހުރަސް އެޅުމުގެ ދައުވާއެވެ. ސުލުހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް މާލޭގެ މަގުތަކަށް އެއްވެ، އާންމު ދަތުރުފަތުރަށާއި ވިޔަފާރިތަކަށް ދަތިވާނެހެން އަމަލުކުރުމުގެ ތުހުމަތުވެސް ފުލުހުން ވަނީ ކޮށްފަ އެވެ.