އެމްޑީޕީގެ ޗެއާޕާސަން ކަމުން، މިދިޔަ އެމްޑީޕީ ސަރުކާރުގެ އިގުތިސޯދީ ވަޒީރު ކަން ކުރެއްވި ފައްޔާޒު އިސްމާއީލް މިރޭ އިސްތިއުފާ ދެއްވައިފި އެވެ.

ފައްޔާޒުގެ އިސްތިއުފާ ސިޓީގައިވާ ގޮތުން އިސްތިއުފާ ދެއްވި ސަބަބަކީ އެމްޑީޕީގެ ރައީސް އަބްދުﷲ ޝާހިދު އާއި ޕާޓީގެ އެޑްވައިޒަރު އަދި ކުރީގެ ރައީސް އިބްރާހީމް މުހައްމަދު ސޯލިހަށް ޕާޓީގެ ކަންކަން ގެންދަން ފުރިހަމަ އިހުތިޔާރާއި ބާރު ދިނުމެވެ. 

އަދި އެ ސިޓީގައި އޭނާ ވަނީ ކުރީގެ ރައީސް މުހައްމަދު ނަޝީދު އާއި ސޯލިހް އާ ދެމެދު އުފެދުނު ހިޔާލުތަފާތުވުންތައް އެއްގޮތްކުރުމަށް ކުރި މަސައްކަތްތައް ވެސް ތިލަކޮށްދެއްވައިފަ އެވެ.

އޭގައި އޭނާ ވިދާޅުވީ ރިޔާސީ ޕްރައިމެރީގައި ސޯލިހް އާ ނަޝީދު ވާދަނުކުރައްވާ ގޮތަށް، ރިޔާސީ އިންތިހާބުގެ ކުރިން ނިޒާމުގެ ވޯޓެއް ނަގަން އެއްބަސްވުމަށްފަހު ވެސް ނަޝީދު އެދިވަޑައިގެންނެވި ގޮތަށް ކުރިއަށް ދާން ފަހުން އެމްޑީޕީ ސަރުކާރުގެ އިސް ބޭފުޅުން ބޭނުން ނުވި ކަމަށެވެ. 

އޭގެ ފަހުން މަޖިލިސް އިންތިހާބުގައި ވެސް އެމްޑީޕީ އާއި ޑިމޮކްރެޓްސް ކޯލިޝަން ހަދައިގެން ވާދަކުރަން ހުށަހެޅި ނަމަވެސް އެ ކަމަށް ޕާޓީގެ އިސް ބޭފުޅުންގެ ތާއީދު ނުލިބުނު ކަމަށް ވެސް އޭނާ ވިދާޅުވި އެވެ.