މަތިވެރި ފުޓްސަލް ލީގު 2025 ބޭއްވުމަށް ސްޕޮންސާ ދިނުމަށް ފުރުސަތު ހުޅުވާލައިފިއެވެ.

މަތިވެރި ފުޓްސަލް ލީގު އިންތިޒާމުކުރާ "މަތިވެރި އެސޯސިއޭޝަން ފޮރ ރެކްރިއޭޝަން އެން ސްޕޯރޓްސް"، މާންސް އަދި އަންބަރު ގްރޫޕްއިން ބުނީ މިހާރުން ފެށިގެން އެ މުބާރާތަށް އެހީތެރިވާން ބޭނުން ފަރާތްތަކަށް އެ ފުރުސަތު ހުޅުވިފައިވާކަމަށެވެ.

އެ މުބާރާތް ހިންގުމަށް އިސްކޮށް ހަރަކާތްތެރިވާ ހަސަން ސިނާން ބުނީ މަތިވެރި ފުޓްސަލް ލީގަށް އެކި ގޮތްގޮތަަށް މުބާރާތަށް ސްޕޮންސާ ކުރެވޭނެކަމަށެވެ.

އެގޮތުން ޓައިޓަލް، މެއިން، އަދި ކޯ ސްޕޮންސަރ އާއެކު، ބެވަރޭޖް ޕާޓްނަރ، މީޑިއާ ޕާޓްނަރ، ޓްރެވަލިންގ ޕާޓްނަރ އަށް ކުރިމަތިލެވޭނެކަމަށް އޭނާ ބުންޏެވެ.

އެ މުބާރާތަށް ސްޕޮންސާ ދޭ ފަރާތްތައް އިޝްތިހާރުކުރުމަށް ދަނޑުގައި އިޝްތިހާރު ބޯޑުތައް   ހާއްސަކުރާނެކަމަށާއި ސޯޝަލް މީޑިއާގައި އަދި މުބާރާތުގައި ބޭނުންކުރާ ހުރިހާ ޕޯސްޓަރެއްގައި ވެސް  ސްޕޮންސަރުން އިޝްތިހާރު ކުރާނެކަމަށް ވެސް ސިނާން ބުންޏެވެ.  

ސިނާން ބުނީ ސްޕޮންސާ ދިނުމަށް ޝައުގުވެރިވާ ފަރާތްތަކުން 7589136 އަށްގުޅައިގެން މަޢުލޫމާތު ސާފު ކުރެވޭނެކަމަށެވެ.

 

މަތިވެރި ފުޓްސަލް ލީގަކީ ފުޓްސަލް ރަށު އަދި އަތޮޅު ފެންވަރުގައި ކުރިއެރުވުމަށް ކުރެވޭ މުހިންމު މަސައްކަތެއްކަމަށް ވެސް އޭނާ ބުންޏެވެ.

މާންސް ޖަމިއްޔާއާއި އަންބަރު ގްރޫޕުން ގުޅިގެން ހިންގާ އެ ލީގުގެ އެންމެ ބޮޑު އެއް ބޭނުމަކީ، ކުޅިވަރު ކުޅުމަށް ޝައުޤުވެރިވާ ޒުވާނުންގެ މެދުގައި ކުޅިވަރުގެ ރޫހު އާލާކުރުމާއި، އިޖްތިމާއަި ގުޅުން ރައްޔިތުންގެ މެދުގައި ބަދަހިކުރުމާއި، ދުޅަހެޔޮ މުޖްތަމައުއެއް ބިނާކުރުން ކަމަށް ވެސް ސިނާން ބުންޏެވެ.

މަތިވެރި ފުޓްސަލް ލީގަކީ 2020 ވަނަ އަހަރުން ފެށިގެން ބާއްވަމުންއަންނަ މުބާރާތެކެވެ. އެ ލީގު ފުރަތަމަ ފެށިފައިވަނީ "ކޮރަލް މަތިވެރި ފުޓްސަލް ލީގު" ގެ ނަމުގައެވެ.