ރާއްޖޭގައި ރަމަޟާން މަސް ދައްކާލުމަށާއި މެދު އިރުމަތިން އަންނަ ފަތުރުވެރިން އިތުރުކުރުމަށްޓަކައި ވިޒިޓް މޯލްޑިވްސްއިން މަޝްހޫރު އެމިރާޓީ އިންފުލުއެންސާ ޚާލިދް އަލް އަމޭރީ ރާއްޖެ ގެނެސްފިއެވެ. 

ވިޒިޓް މޯލްޑިވްސްއިން ބުނީ މަޝްހޫރު އެމިރާޓީ ކޮންޓެންޓް ކްރިއޭޓާރ އަދި ޑިޖިޓަލް ސްޓޯރީޓެލާ ރާއްޖޭގައި ހޭދަކުރާނީ ހަތަރު ދުވަސްކަމަށެވެ. އެއީ މި މަހުގެ 22 އިން 26ގެ ނިޔަލަށެވެ. މި މުއްދަތުގެ ތެރޭގައި މެދު އިރުމަށްޗާއި ޖީސީސީ ސަރަހައްދުގެ ފަތުރުވެރިންނަށް އަމާޒުކޮށްގެން އެންމެ ފަހުވަގުތުގެ ބުކިންތަކަށް ރާއްޖެއަކީ އެންމެ ރަނގަޅު ގޭޓްވޭއެއްގެ ގޮތުގައި އޭނާގެ ހިތްގައިމު ޕޯސްޓްތައް ފާހަގަކުރެވިގެންދާނެ ކަމަށެވެ. 

މި ހަރަކާތަކި މެދު އިރުމަތީގެ ބޮޑު އޯޑިއަންސަކަށް ރާއްޖޭގެ ތަފާތު ރީތިކަމާއި، މުއްސަނދި ސަގާފީ ތަރިކަ ދައްކާލުމުގެ މަގްސަދުގައި ކުރިއަށްގެންދާ ހަރަކާތެއްކަމަށް ވިޒިޓް މޯލްޑިވްސްއިން ބުފައިވެއެވެ. މިގޮތުން އެކާވީސް މިލިއަނަށްވުރެ ގިނަ ފޮލޯވަރުން ގެންގުޅޭ ޚާލިދު އަމޭރީ ފާހަގަކުރެވިފައިވަނީ ސަގާފީ ތަފާތުތައް ނައްތާލާ އިސްލާމީ އާދަކާދަތަކާއި، މުޖްތަމައުގެ އަސާސްތައް ފާޅުކުރުމަށް ކުޅަދާނަ އިންފްލުއެންސަރެއް ގޮތުގައިކަމަށް ވިޒިޓް މޯލްޑިވްސްއިން ބުނެފައިވެއެވެ. 

މީގެ އިތުރުން ވިޒިޓް މޯލްޑިވްސްއިން ބުނެފައިވަނީ ޚާލިދް އަލް އަމޭރީއަށް މި ފުރުސަތު ދިނީ އޭނާއަކީ މެދު އިރުމަތީގެ މާކެޓްގެ ތެރޭގައި ވަރަށް މަގްބޫލު މީހެއްކަމަށް ވާތީއާއި، ރާއްޖޭގެ ތަފާތު ހުށައެޅުންތައް ދައްކާލުމަށް އޭނާއަކީ އެންމެ އެކަށީގެންވާ ބައިވެރިޔާ ކަމުގައިވާތީ ކަމަށެވެ. މީގެ އިތުރުންވެސް ގަލްފް ބިޒްނަސް "100މޯސްޓް ޕަވަފުލް އަރަބްސް" ލިސްޓުގައިވެސް ޚާލިދުގެ ނަން ހިމެނިފައިވާތީއާއި، އޭނާގެ ހިތްގައިމު އަދި މަޖާ ކޮންޓެންޓްތަކުން ދުނިޔާޭގެ އެކި ކަންކޮޅުތަކުގައި ތިބި މީހުން އެއްބައިވަންތަ ކުރަމުން ގެންދާތީކަމަށް ވިޒިޓް މޯލްޑިވްސްއިން ބުނެފައިވެއެވެ. 

ވިޒިޓް މޯލްޑިވްސްއިން ބުނެފައިވަނީ މިދަތުރުގެ މައިގަނޑު މަގްސަދަކަށް ވާނީ ޚާލިދުގެ ނުފޫޒުގަދަ ސޯޝަލްމީޑިއާގެ ޕްލެޓްފޯމްތައް ބޭނުންކޮށްގެން ރާއްޖެއަކީ އަންނަން އެންމެ ރަނގަޅު މަންޒިލްކަމަށް އިޝްތިހާރުކުރުން ކަމަށެވެ. އެގޮތުން ޚާލިދުގެ މި ދަތުރުގައި ފޭސްބުކް އަދި އިންސްޓަރގްރާމްގައި ކޮންމެ ދުވަހަކު ޕޯސްޓްކޮށް ހިތްގައިމު ކޮންޓެންޓް ފީސްތަކެއް އުފައްދާނެ ކަމަށެވެ. މީގެ ތެރޭގައި ފޮޓޮ ޕޯސްތަކާއި، ކެރޯސަލް އަދި އެކި ޕްލެޓްފޯމްތަކުގައި ކޮމިއުނިޓީ ޕޯސްޓްތައް ޝާއިއުކުރާނެކަމަށް ބުނެފައިވެއެވެ. 

ޚާލިދުގެ ޕޯސްޓްތަކުގައި ރަމަޟާންމަހު ރާއްޖޭގައި ހޭދަކުރާ ވަގުތުގައި އޭނާގެ އަމިއްލަ ތަޖުރިބާތަކާއި، ގޮނޑުދޮށުގައި ރޯދަވީއްލުންފަދަ ރާއްޖޭގެ ސަގާފީ އާދަކާދަތަކާއި، މެދު އިރުމަތީގެ ފަތުރުވެރިންނަސް ޚާއްސަ ލަގްޒަރީ ސްޓޭތައް ދައްކާލާނެކަމަށް ވިޒިޓް މޯލްޑިވްސްއިން ބުނެފައިވެއެވެ. މީގެ އިތުރުންވެސް ހަލާލު ދަތުރުފަތުރާއި، ސަގާފީ ތަޖުރިބާތަކަށް ހާއްސަ ސަމާލުކަމެއް ދީގެން ރާއްޖޭގެ ހިތްގައިމު މަންޒަރުތަކާއި، މެހެމާންދާރީ އާއީ ރާއްޖޭގެ އާދަކާދަތައް ޚާލިދުގެ 3.2 މިލިއަން ބެލުންތެރިންނާއި ހަމައަށް ފޯރުކޮށްދެވޭނެކަމަށް ބުނެފައިވެއެވެ.