އއ. މަތިވެރީގައި ޙަރަކާތްތެރިވަމުންދާ ހީވާގި ޖަމިއްޔާއެއް ކަމަށްވާ މަތިވެރި އެސޯސިއޭޝަން ފޯރ ރިކްރިއޭޝަން އެން ސްޕޯރޓްސް، މާރންސް ޖަމިއްޔާގެ "ބިދޭސީންގެ ރޯދަވީއްލުން" ކާމިޔާބުކަމާ އެކު ނިންމާލާފިއެވެ.
 

ރަށުގައި ދިރިއުޅެމުންދާ ބިދޭސީންނަށް ހާއްސަކޮށް ރޯދަވީއްލުން ބޭއްވުމަކީ، މާރންސް ޖަމިއްޔާއިން ކޮންމެ އަހަރެއްގެ ވެސް ރަމަޟާން މަހެއްގެއި ކުރަމުން އަންނަ ކަމެއް ކަމަށް އެ ޖަމިއްޔާއިން މަޢުލޫމާތުދެއެވެ. އެގޮތުން، 2022 ވަނަ އަހަރުން ފެށިގެން ކޮންމެ އަހަރެއްގެ ވެސް ރަމަޟާން މަހެއްގައި 1 ދުވަހުގެ މުއްދަތަކަށް މި ޙަރަކާތް ކުރިއަށް ގެންދާކަމަށް އެ ޖަމިއްޔާއިން ބުނެއެވެ.

މާރންސް ޖަމިއްޔާގެ ނައިބު ރައީސް އާދަމް ނިޔާޒް އިބްރާހިމް ވިދާޅުވީ، ބިދޭސީންނަށް ހާއްސަކޮށްގެން މިފަދަ ޙަރަކާތެއް ހިންގުމުގެ އެންމެ ބޮޑު އެއް މަގްސަދަކީ، ބޭރުގެ އެކި ގައުމުތަކުން ރާއްޖެއަށް އައިސް މަސައްކަތުގެ މާޙައުލުގައި ހަރަކާތްތެރިވެ އުޅޭ ފަރާތްތަކުގެ އަގުވަޒަންކުރުން ކަމަށެވެ. ހަމަ އެހެންމެ، މިކަމުގެ ސަބަބުން މަތިވެރީގައި މަސައްކަތް ކުރާ ބިދޭސީންނަށް ވެސް އެމީހުންނަކީ މުޖްތަމަޢުގެ ތެރޭގައި އަގެއްހުރި ބައެއްކަން އެނގިގެންދާނެ ކަމަށް ނައިބު ރައީސް ވިދާޅުވިއެވެ.

 

"އަސްލު ބިދޭސީންނަށް ހާއްސަކޮށްގެން މިކަހަލަ ހަރަކާތެއް ހިންގީމަ އެމީހުންގެ މޫނު މަތިން އެ ފެންނަ ހިނިތުންވުމުން އެކަނި ވެސް އަޅުގަނޑުމެން ވަރަށް އުފާވެގެންދޭ. ދެން އެމީހުންގެ އާއިލާ ދޫކޮށްލާފަ އައިސް ރާއްޖޭގެ ރައްޔިތުންނަށް ހިދުމަތްކޮށްދޭން އެ އުޅެނީ، އެހެންވީމަ މިކަހަލަ ހަރަކާތަކުން ވެސް އެމީހުންނަށް އެއް ސުފުރާމަތީގަ ކެއުމަށް މަގުފަހިވެ އެމީހުންގެ މެދުގައި ގުޅުން ބަދަހިކުރުމަށް ފުރުސަތެއް ފަހިވެގެން އެބަދޭ" މާރންސް ޖަމިއްޔާގެ ނައިބު ރައީސް އާދަމް ނިޔާޒް އިބްރާހިމް ވިދާޅުވިއެވެ.

މިއަހަރުގެ ބިދޭސީންގެ ރޯދަވީއްލުން ރަމަޟާންމަހުގެ 10 ވަނަ ދުވަހަށް ތާވަލުކޮށް، ކާމިޔާބުކަމާ އެކު ނިންމާލާފައިވާއިރު، މި ހަރަކާތަށް ބޭނުންވާ އެންމެހާ ކަންކަން ކޮށްފައިވަނީ އެ ޖަމިއްޔާގެ މެންބަރުންނެވެ. އެގޮތުން، މި ހަރަކާތާއި ގުޅިގެން ޖަމިއްޔާގެ ކޮންމެ މެންބަރަކު ވެސް ވަނީ އެ ފަރާތަކަށް ވެވެން އޮތް އެހީތެރިކަމެއް ފޯރުކޮށްދީފައި ކަމަށް އެ ޖަމިއްޔާއިން މަޢުލޫމާތުދެއެވެ. އަދި މި ރޯދަވީއްލުމަށް ބޭނުންވާ ކާ ތަކެތި ވެސް ތައްޔާރުކޮށްފައިވަނީ އެ ޖަމިއްޔާގެ މެންބަރުން ދިރިއުޅެމުންދާ ގޭބީސީތަކުން ކަމަށް މާރންސް ޖަމިއްޔާއިން ބުނެއެވެ.

 

މި ޙަރަކާތާއި ގުޅިގެން މަތިވެރީގައި މަސައްކަތްކުރަމުންދާ ބިދޭސީންގެ ޝުކުރާއި ތައުރީފު މާރންސް ޖަމިއްޔާއަށް ލިބިފައިވާއިރު، ކުރިއަށް އޮތް އަހަރުތަކުގައި ވެސް މި ޙަރަކާތް އިތުރަށް ފުޅާކޮށް ބޭއްވުމަށް މަސައްކަތްކުރާނެ ކަމުގެ ޔަގީންކަން މާރންސް ޖަމިއްޔާއިން ވަނީ ދީފައެވެ.